കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിലെ പ്രവർത്തനങ്ങൾ പുനരാരംഭിച്ചതിനെ തുടർന്ന് കുവൈത്ത് എയർവേയ്സും ജസീറ എയർവേയ്സും ഈ ആഴ്ച മൊത്തം 73 വാണിജ്യ വിമാന സർവീസുകൾ നടത്തുമെന്ന് അറിയിച്ചു.കുവൈത്ത് എയർവേയ്സ് ടെർമിനൽ 4 (T4) വഴി 35 സർവീസുകൾ ആരംഭിച്ചു. ബെയ്റൂത്ത്, റിയാദ്, ലണ്ടൻ, ഇസ്താംബൂൾ, ധാക്ക, മുംബൈ, കൊച്ചി, കൊളംബോ, ഡൽഹി, മനില, കൈറോ, ജിദ്ദ, തിരുവനന്തപുരം എന്നിവ ഉൾപ്പെടെ 13 ലക്ഷ്യസ്ഥാനങ്ങളിലേക്കാണ് പ്രാരംഭ സർവീസുകൾ. ചില റൂട്ടുകൾക്ക് ആഴ്ചയിൽ നിശ്ചിത ദിവസങ്ങളിൽ സർവീസുകൾ ഉണ്ടായിരിക്കുമെന്ന് അധികൃതർ അറിയിച്ചു.
അതേസമയം, ജസീറ എയർവേയ്സ് ടെർമിനൽ 5 (T5) വഴി 38 സർവീസുകൾ ആരംഭിച്ചു. ജിദ്ദ, റിയാദ്, അമ്മാൻ, ബെയ്റൂത്ത്, ഡമാസ്കസ്, മുംബൈ, കൈറോ, കൊച്ചി, ഡൽഹി, ഇസ്താംബൂൾ എന്നിവയാണ് പ്രധാന ലക്ഷ്യസ്ഥാനങ്ങൾ. ചില റൂട്ടുകളിൽ ദിവസേന സർവീസുകളും മറ്റുചില റൂട്ടുകളിൽ ആഴ്ചയിൽ നിശ്ചിത ദിവസങ്ങളിൽ സർവീസുകളും ഉണ്ടായിരിക്കും.
വിമാന സർവീസുകൾ ഘട്ടംഘട്ടമായി പുനരാരംഭിക്കുന്നതിനൊപ്പം യാത്രക്കാരുടെ സൗകര്യത്തിനായി പുതുക്കിയ നടപടിക്രമങ്ങളും ഏർപ്പെടുത്തിയിട്ടുണ്ട്. ടെർമിനൽ 5-ൽ ‘പാർക്ക് & ഫ്ലൈ’ സംവിധാനത്തിലൂടെ യാത്രക്കാരെ ബസുകളിൽ കൊണ്ടുപോകുന്ന രീതിയും നടപ്പിലാക്കും.യാത്രക്കാർ മുൻകൂട്ടി ടിക്കറ്റ് വിവരങ്ങൾ പരിശോധിക്കുകയും സമയത്തിന് മുമ്പ് വിമാനത്താവളത്തിൽ എത്തുകയും ചെയ്യണമെന്ന് വിമാനക്കമ്പനികൾ അറിയിച്ചു. വിമാനത്താവളത്തിന്റെ എയർസ്പേസ് പുനരാരംഭിച്ചതിനെ തുടർന്ന് അടുത്ത ആഴ്ചകളിൽ കൂടുതൽ സർവീസുകൾ കൂടി ഉൾപ്പെടുത്തുമെന്ന് അധികൃതർ വ്യക്തമാക്കി.
