കുവൈത്ത് സിറ്റി: 2026ലെ ഈദ് അൽ അദ്ഹാ (ബലിപെരുന്നാൾ) മേയ് 27ന് ആയിരിക്കാമെന്ന് കുവൈത്ത് ആസ്ട്രോണമിക്കൽ സൊസൈറ്റിയുടെ ചെയർമാൻ ആദൽ അൽ-സാഡൂൺ അറിയിച്ചു. ഇത് ജ്യോതിശാസ്ത്ര കണക്കുകൾ അടിസ്ഥാനമാക്കിയുള്ളതാണ്.മെയ് 16 രാത്രി 11 മണിക്ക് ചന്ദ്രൻ സൂര്യനുമായി സംയോജിതമാകുമെന്നും, അന്ന് വൈകുന്നേരം ദുൽഹിജ്ജ മാസത്തിന്റെ ചന്ദ്രക്കല കാണാനാകില്ലെന്നും അദ്ദേഹം പറഞ്ഞു.
എന്നാൽ മെയ് 17 വൈകുന്നേരം ചന്ദ്രക്കല സാധാരണ കണ്ണിലൂടെ കാണാനാകുമെന്നാണ് പ്രതീക്ഷ.ഇതനുസരിച്ച് ദുൽഹിജ്ജയുടെ ആദ്യ ദിവസം മേയ് 18 ആയിരിക്കാം. അറഫ ദിനം മേയ് 26നും, ഈദ് അൽ അദ്ഹാ മേയ് 27നുമാണ് പ്രതീക്ഷിക്കുന്നതെന്നും അദ്ദേഹം വ്യക്തമാക്കി.ഈദ് ദിവസങ്ങളിൽ പകൽ സമയത്ത് ചൂടേറിയ കാലാവസ്ഥയും രാത്രിയിൽ കുറച്ചുകൂടി ശമനമുള്ള കാലാവസ്ഥയും ഉണ്ടാകാമെന്ന് അദ്ദേഹം കൂട്ടിച്ചേർത്തു. എങ്കിലും, ചന്ദ്രദർശനത്തെ അടിസ്ഥാനമാക്കി ബന്ധപ്പെട്ട അധികാരികൾ ഔദ്യോഗികമായി പ്രഖ്യാപിക്കുന്ന തീയതിയാണ് അന്തിമമായി പ്രാബല്യത്തിൽ വരിക.
