കുവൈറ്റ് സിറ്റി: രാജ്യത്തെ പ്രധാന പാതകളിലൊന്നായ അഞ്ചാം റിങ് റോഡിൽ ചൊവ്വാഴ്ച മുതൽ ഭാഗിക ഗതാഗത നിയന്ത്രണം ഏർപ്പെടുത്തുന്നതായി പൊതുമരാമത്ത് മന്ത്രാലയം അറിയിച്ചു. ഗതാഗത വകുപ്പുമായി സഹകരിച്ചാണ് സൽമിയ ഭാഗത്തേക്കുള്ള പാതയിൽ ഈ നിയന്ത്രണം നടപ്പിലാക്കുന്നത്. റോഡ് അറ്റകുറ്റപ്പണികളുടെ ഭാഗമായി അൽ-സലാം ഏരിയയ്ക്ക് എതിർവശത്തുള്ള മൂന്ന് ഇടത് വശത്തെ വരികളാണ് താത്കാലികമായി അടച്ചിടുന്നത്. എന്നാൽ കിംഗ് ഫഹദ് ബിൻ അബ്ദുൽ അസീസ് റോഡിലേക്ക് (റൂട്ട് 40) പോകുന്ന മൂന്ന് വരികൾ ഗതാഗതത്തിനായി തുറന്നുതന്നെയിരിക്കും.
മെയ് 12 ചൊവ്വാഴ്ച പുലർച്ചെ മുതൽ ആരംഭിക്കുന്ന ഈ നിയന്ത്രണങ്ങൾ മെയ് 17 വരെ തുടരുമെന്ന് അധികൃതർ വ്യക്തമാക്കി. റോഡിലെ ടാറിംഗും മറ്റ് അനുബന്ധ അറ്റകുറ്റപ്പണികളും സുഗമമായി പൂർത്തിയാക്കുന്നതിനാണ് ഈ ക്രമീകരണം. ഈ ദിവസങ്ങളിൽ അഞ്ചാം റിങ് റോഡിലൂടെ യാത്ര ചെയ്യുന്ന വാഹനമോടിക്കുന്നവർ അതീവ ജാഗ്രത പാലിക്കണമെന്നും തിരക്ക് ഒഴിവാക്കാൻ സാധ്യമായ ഇടങ്ങളിൽ ബദൽ പാതകൾ ഉപയോഗിക്കണമെന്നും അധികൃതർ നിർദ്ദേശിച്ചു
