കുവൈറ്റ് സിറ്റി: നിരോധിത ഭീകര സംഘടനയായ ഐസിസിൽ ചേർന്ന കേസിൽ കുറ്റക്കാരനെന്ന് കണ്ടെത്തിയ പ്രതിക്ക് പത്ത് വർഷം കഠിനതടവ് വിധിച്ച് കുവൈറ്റ് ക്രിമിനൽ കോടതി. കോടതിയിലെ സ്റ്റേറ്റ് സെക്യൂരിറ്റി ആൻഡ് ടെററിസം ക്രൈംസ് ഡിപ്പാർട്ട്മെന്റാണ് പ്രതിയുടെ പേരുവിവരങ്ങൾ വെളിപ്പെടുത്താതെ ഈ നിർണായക വിധി പ്രസ്താവിച്ചത്.രാജ്യത്തിന്റെ ആഭ്യന്തര സുരക്ഷയെ തകർക്കുന്ന തരത്തിലുള്ള പ്രവർത്തനങ്ങളിൽ പ്രതി ഏർപ്പെട്ടിരുന്നതായും നിയമപരമായി നിരോധിച്ച സംഘടനയുമായി നിരന്തരം ബന്ധം പുലർത്തിയിരുന്നതായും സ്റ്റേറ്റ് സെക്യൂരിറ്റി ഓഫീസർ നടത്തിയ അന്വേഷണത്തിൽ സ്ഥിരീകരിച്ചിരുന്നു.
കുവൈറ്റിന്റെ പൊതുസുരക്ഷാ നിയമങ്ങളുടെയും ചട്ടങ്ങളുടെയും നഗ്നമായ ലംഘനമാണ് പ്രതി നടത്തിയതെന്ന് അന്വേഷണസംഘം കണ്ടെത്തി.ദേശീയ സുരക്ഷിതത്വത്തിനും സ്ഥിരതയ്ക്കും ഭീഷണിയാകുന്ന ഭീകരവാദ പ്രവർത്തനങ്ങളോടും നിരോധിത സംഘടനകളോടുമുള്ള രാജ്യത്തിന്റെ കർശന നിലപാടാണ് കോടതി വിധിയിലൂടെ വീണ്ടും വ്യക്തമാകുന്നത്. രാജ്യസുരക്ഷയെ ബാധിക്കുന്ന ഇത്തരം ഗുരുതരമായ കുറ്റകൃത്യങ്ങളോട് യാതൊരു വിട്ടുവീഴ്ചയുമില്ലെന്ന ജുഡീഷ്യറിയുടെ ശക്തമായ സമീപനത്തിന് അടിവരയിടുന്നതാണ് ഈ നടപടി.
