കുവൈറ്റ് സിറ്റി: കടലിലും നീന്തൽക്കുളങ്ങളിലും ആവർത്തിച്ചുണ്ടാകുന്ന മുങ്ങിമരണങ്ങൾക്കെതിരെ പൊതുജനങ്ങൾക്ക് കർശന ജാഗ്രതാ നിർദ്ദേശവുമായി ജനറൽ ഫയർ ഫോഴ്സ്. സുരക്ഷാ മാനദണ്ഡങ്ങൾ കൃത്യമായി പാലിക്കുന്നതും, പ്രത്യേകിച്ച് കുട്ടികളെ നിരന്തരം നിരീക്ഷിക്കുന്നതുമാണ് ഇത്തരം ദാരുണമായ അപകടങ്ങൾ കുറയ്ക്കുന്നതിനും ജീവൻ സംരക്ഷിക്കുന്നതിനുമുള്ള പ്രധാന പ്രതിരോധ മാർഗ്ഗമെന്ന് അധികൃതർ ഊന്നിപ്പറഞ്ഞു.2026-ന്റെ ആദ്യ പകുതിയിൽ മാത്രം രാജ്യത്ത് ഒൻപത് മുങ്ങിമരണ റിപ്പോർട്ടുകൾ രേഖപ്പെടുത്തിയതായും ഇതിൽ നാല് പേർക്ക് ജീവൻ നഷ്ടപ്പെട്ടതായും ജനറൽ ഫയർ ഫോഴ്സ് പബ്ലിക് റിലേഷൻസ് ആൻഡ് മീഡിയ ഡയറക്ടർ ബ്രിഗേഡിയർ ജനറൽ മുഹമ്മദ് അൽ-ഗരീബ് വെളിപ്പെടുത്തി. ഈ സാഹചര്യത്തിൽ കമ്മ്യൂണിറ്റി തലത്തിലുള്ള സുരക്ഷാ ബോധവൽക്കരണം ശക്തമാക്കേണ്ടതും പ്രതിരോധ നടപടികളോടുള്ള പ്രതിബദ്ധത വർദ്ധിപ്പിക്കേണ്ടതും അടിയന്തിര ആവശ്യമാണെന്ന് അദ്ദേഹം ചൂണ്ടിക്കാട്ടി.
കടലിലെ രക്ഷാപ്രവർത്തനങ്ങൾക്കായി പ്രത്യേക മറൈൻ സെർച്ച് ആൻഡ് റെസ്ക്യൂ ടീമുകൾ സദാസജ്ജമായി രംഗത്തുണ്ടെന്ന് അൽ-ഗരീബ് വിശദീകരിച്ചു. കൃത്യമായ സുരക്ഷാ മാർഗ്ഗനിർദ്ദേശങ്ങൾ പാലിക്കുകയും, അപകടസാധ്യതയുള്ളതോ നീന്തൽ നിരോധിച്ചിട്ടുള്ളതോ ആയ സ്ഥലങ്ങളിൽ ഇറങ്ങാതിരിക്കുകയും ചെയ്തിരുന്നെങ്കിൽ പല അപകടങ്ങളും ഒഴിവാക്കാമായിരുന്നുവെന്ന് അദ്ദേഹം കൂട്ടിച്ചേർത്തു. വിവിധ തരത്തിലുള്ള വിനോദങ്ങളിലും കടൽയാത്രകളിലും ഏർപ്പെടുന്നതിന് മുൻപ് നിലവിലെ കാലാവസ്ഥാ വ്യതിയാനങ്ങൾ കൃത്യമായി മനസ്സിലാക്കണമെന്നും അധികൃതർ പൊതുജനങ്ങളോട് അഭ്യർത്ഥിച്ചു.
