കുവൈറ്റ് സിറ്റി: കുവൈറ്റിലെ ജലീബ് അൽ ശുയൂഖ് മേഖലയിൽ അധികൃതർ നടത്തിയ വിപുലമായ സുരക്ഷാ കാമ്പെയ്ന്റെ ഭാഗമായി പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷൻ കടുത്ത പരിശോധനകൾ നടത്തി. മറ്റ് വിവിധ സർക്കാർ ഏജൻസികളുമായി സഹകരിച്ച് തുടർച്ചയായി 48 മണിക്കൂർ നടത്തിയ ഈ പ്രത്യേക പരിശോധനയിൽ 315 നിയമലംഘനങ്ങളാണ് രജിസ്റ്റർ ചെയ്തത്.
കൂടാതെ, മനുഷ്യോപയോഗത്തിന് അനുയോജ്യമല്ലാത്ത രീതിയിൽ കണ്ടെത്തിയ വൻതോതിലുള്ള ഭക്ഷ്യവസ്തുക്കൾ അധികൃതർ പിടിച്ചെടുത്ത് നശിപ്പിക്കുകയും ചെയ്തു.ഭക്ഷണത്തിന്റെ ഗുണനിലവാരവും സുരക്ഷിതത്വവും ഉറപ്പാക്കുന്നതിനും പൊതുജനാരോഗ്യം സംരക്ഷിക്കുന്നതിനുമായി കുവൈറ്റിലെ വിവിധ ഗവർണറേറ്റുകളിൽ അതോറിറ്റി പരിശോധനകൾ ശക്തമാക്കിയിരിക്കുകയാണ്. വരും ദിവസങ്ങളിലും നിയമലംഘകർക്കെതിരെ കർശനമായ നിയമനടപടികളുമായി മുന്നോട്ടുപോകുമെന്ന് ഭക്ഷ്യ-പോഷകാഹാര അതോറിറ്റി വക്താക്കൾ അറിയിച്ചു.
