കുവൈത്ത് സിറ്റി: റോഡ് സുരക്ഷ വർദ്ധിപ്പിക്കുന്നതിനും യാത്രക്കാർക്കും മറ്റു റോഡ് ഉപയോക്താക്കൾക്കും അപകടമുണ്ടാക്കുന്ന ഗതാഗത ലംഘനങ്ങൾ തടയുന്നതിനുമായി ഡെലിവറി മോട്ടോർസൈക്കിളുകൾ ലക്ഷ്യമിട്ടുള്ള പരിശോധനാ കാമ്പെയ്ൻ കുവൈത്ത് ആഭ്യന്തര മന്ത്രാലയം ഊർജിതമാക്കി. ജനറൽ ട്രാഫിക് ഡിപ്പാർട്ട്മെന്റിന്റെ നേതൃത്വത്തിലാണ് ഈ നടപടികൾ പുരോഗമിക്കുന്നത്. ഡെലിവറി റൈഡർമാർ ട്രാഫിക് നിയമങ്ങൾ പാലിക്കുന്നുണ്ടെന്ന് ഉറപ്പുവരുത്താനും നിയമലംഘനം നടത്തുന്നവർക്കെതിരെ കർശന നിയമനടപടി സ്വീകരിക്കാനും ലക്ഷ്യമിട്ടാണ് ഈ പരിശോധനകൾ.
റോഡിന്റെ വലതുവശത്തുകൂടി മാത്രം സഞ്ചരിക്കുക, നിശ്ചയിച്ചിട്ടുള്ള സ്ഥലങ്ങൾക്ക് പുറത്ത് വാഹനങ്ങൾ നിർത്തിയിടാതിരിക്കുക, റോഡിലെ വരകളും അടയാളങ്ങളും മാനിക്കുക, ട്രാഫിക് സിഗ്നലുകൾ പാലിക്കുക തുടങ്ങിയ പ്രധാന കാര്യങ്ങളിലാണ് അധികൃതർ പ്രധാനമായും ശ്രദ്ധ കേന്ദ്രീകരിക്കുന്നത്. റോഡുകളിലെ അച്ചടക്കം ശക്തിപ്പെടുത്തുന്നതിനും അപകടസാധ്യതകൾ കുറയ്ക്കുന്നതിനുമുള്ള വിപുലമായ ശ്രമങ്ങളുടെ ഭാഗമായി കുവൈത്തിന്റെ വിവിധ ഭാഗങ്ങളിൽ ഈ പരിശോധനകൾ തുടരുമെന്ന് ആഭ്യന്തര മന്ത്രാലയം അറിയിച്ചു.
തങ്ങളുടെ ജീവനക്കാർ ട്രാഫിക് നിയമങ്ങളും ചട്ടങ്ങളും കൃത്യമായി പാലിക്കുന്നുണ്ടെന്ന് ഡെലിവറി കമ്പനികൾ ഉറപ്പുവരുത്തണമെന്ന് മന്ത്രാലയം ആവശ്യപ്പെട്ടു. സ്വന്തം സുരക്ഷയും മറ്റു റോഡ് ഉപയോക്താക്കളുടെ സുരക്ഷയും മുൻനിർത്തി ഡെലിവറി റൈഡർമാർ നിർബന്ധമായും ഹെൽമെറ്റ് ധരിക്കണമെന്നും, വേഗത പരിധി പാലിക്കണമെന്നും, റോഡ് നിയമങ്ങൾ കർശനമായി അനുസരിക്കണമെന്നും അധികൃതർ ഓർമ്മിപ്പിച്ചു.
