കുവൈറ്റ് സിറ്റി: റുമൈത്തിയയിൽ യുവതിയെ കൊലപ്പെടുത്തിയ കേസിൽ പ്രതിക്ക് കീഴ്ക്കോടതി വിധിച്ച വധശിക്ഷ കുവൈറ്റ് കാസേഷൻ കോടതി ശരിവെച്ചു. ജസ്റ്റിസ് സാലിഹ് അൽ-മുർഷിദ് അധ്യക്ഷനായ ബെഞ്ചാണ് നിർണ്ണായകമായ ഈ ഉത്തരവ് പുറപ്പെടുവിച്ചത്. കുറ്റകൃത്യം മറച്ചുവെക്കുന്നതിനായി പ്രതി യുവതിയുടെ മൃതദേഹം ഒരു സ്യൂട്ട്കേസിനുള്ളിലാക്കി ഉപേക്ഷിക്കാൻ ശ്രമിച്ചതായി കേസ് രേഖകൾ വ്യക്തമാക്കുന്നു.ക്രിമിനൽ കോടതിയിലെ വിചാരണ വേളയിൽ പബ്ലിക് പ്രോസിക്യൂഷനെ പ്രതിനിധീകരിച്ച പ്രോസിക്യൂട്ടർ ഫാരിസ് അൽ-ദബ്ബൂസ്, കുറ്റകൃത്യത്തിന്റെ ക്രൂരതയും ജീവിക്കാനുള്ള മൗലികാവകാശത്തിന്റെ ലംഘനവും ചൂണ്ടിക്കാട്ടി പ്രതിക്ക് പരമാവധി ശിക്ഷ തന്നെ നൽകണമെന്ന് ആവശ്യപ്പെട്ടിരുന്നു.
എല്ലാ മതങ്ങളും സംരക്ഷിക്കുന്ന ജീവിക്കാനുള്ള അവകാശം നിഷേധിച്ച് ഇരയുടെ നിഷ്കളങ്കത തകർത്ത വേട്ടക്കാരനാണ് പ്രതിയെന്ന് പ്രോസിക്യൂഷൻ വിശേഷിപ്പിച്ചു. നീതി നടപ്പാക്കുന്നതിനും സമാനമായ കുറ്റകൃത്യങ്ങൾക്ക് മുതിരുന്നവർക്ക് ശക്തമായ താക്കീത് നൽകുന്നതിനും ഏറ്റവും കഠിനമായ ശിക്ഷ തന്നെ നൽകണമെന്നും പ്രോസിക്യൂഷൻ കോടതിയിൽ വാദിച്ചിരുന്നു.പ്രതിക്ക് മാനസികാരോഗ്യ പ്രശ്നങ്ങളൊന്നുമില്ലെന്നും, പൂർണ്ണമായ ബോധത്തോടെയും തിരിച്ചറിവോടെയുമാണ് കൃത്യം നിർവ്വഹിച്ചതെന്നും മനോരോഗ വിദഗ്ധർ അടങ്ങുന്ന മെഡിക്കൽ കമ്മിറ്റി സമർപ്പിച്ച റിപ്പോർട്ടിൽ സ്ഥിരീകരിച്ചിരുന്നു.
ക്രിമിനൽ കോടതിയും അപ്പീൽ കോടതിയും കാസേഷൻ കോടതിയും വധശിക്ഷ ശരിവെച്ചതിലൂടെ പ്രതി ഈ ശിക്ഷ അർഹിക്കുന്നുവെന്ന് ഉറപ്പായതായി കൊല്ലപ്പെട്ട യുവതിയുടെ അനന്തരാവകാശികളുടെ അഭിഭാഷകനായ യൂസഫ് അൽ-അത്താർ ചൂണ്ടിക്കാട്ടി. നീതി ഉറപ്പാക്കുന്നതിനായി വധശിക്ഷ എത്രയും വേഗം നടപ്പാക്കുന്നതിനായി കാത്തിരിക്കുകയാണെന്നും നിരപരാധികളുടെ ജീവനെടുക്കാൻ ചിന്തിക്കുന്നവർക്ക് ഇതൊരു വലിയ പാഠമായിരിക്കുമെന്നും അദ്ദേഹം കൂട്ടിച്ചേർത്തു.



