കുവൈറ്റ്സിറ്റി: വർദ്ധിച്ചുവരുന്ന സംഘർഷങ്ങളും അവയുടെ ദാരുണമായ മാനുഷിക പ്രത്യാഘാതങ്ങളും കണക്കിലെടുത്ത്, സ്ത്രീകളുടെയും കുട്ടികളുടെയും സംരക്ഷണം അന്താരാഷ്ട്ര സമൂഹത്തിന്റെ മുൻഗണനകളിൽ എപ്പോഴും നിലനിൽക്കണമെന്ന് കുവൈറ്റ് വ്യക്തമാക്കി. ജനീവയിലെ ഐക്യരാഷ്ട്രസഭയുടെ സ്ഥിരം പ്രതിനിധി കാര്യാലയത്തിലെ ഡെപ്യൂട്ടി പെർമനന്റ് റെപ്രസന്റേറ്റീവ് കൗൺസിലർ നാസ്സർ അൽ-റംസിയാണ് ഇക്കാര്യം അറിയിച്ചത്.
യുഎൻ മനുഷ്യാവകാശ കൗൺസിലിന്റെ 60/19-ാം നമ്പർ പ്രമേയത്തിന്റെ അടിസ്ഥാനത്തിലുള്ള മനുഷ്യാവകാശ ഹൈക്കമ്മീഷണർ വോൾക്കർ ടർക്കിന്റെ റിപ്പോർട്ട് ചർച്ച ചെയ്യുന്നതിനിടയിലാണ് അദ്ദേഹം ഈ പ്രസംഗം നടത്തിയത്. സംഘർഷ മേഖലകളിലും അതിനുശേഷമുള്ള സാഹചര്യങ്ങളിലും സ്ത്രീകളുടെയും കുട്ടികളുടെയും മനുഷ്യാവകാശങ്ങൾ പ്രോത്സാഹിപ്പിക്കുന്നതും സംരക്ഷിക്കുന്നതുമാണ് ഈ പ്രമേയം.
സംഘർഷങ്ങളുടെ ഏറ്റവും വലിയ ഭാരം ചുമക്കുന്നത് സ്ത്രീകളും കുട്ടികളുമാണെന്ന് അൽ-റംസി ചൂണ്ടിക്കാണിച്ചു. ഗാസ മുടക്ക് ഉൾപ്പെടെയുള്ള സംഘർഷ മേഖലകളിൽ കൊലപാതകം, പലായനം ചെയ്യപ്പെടൽ എന്നിവയ്ക്കുപുറമെ ഭക്ഷണം, ആരോഗ്യ സംരക്ഷണം, വിദ്യാഭ്യാസം തുടങ്ങിയ അടിസ്ഥാനാവകാശങ്ങൾ പോലും സാധാരണക്കാരിൽ നിന്ന് നിഷേധിക്കപ്പെടുന്ന ഗുരുതരമായ മാനുഷികാന്തരീക്ഷമാണ് നിലവിലുള്ളതെന്നും അദ്ദേഹം വ്യക്തമാക്കി.
