കുവൈത്ത്: ഹവല്ലി ഗവർണറേറ്റിലെ വിവിധ പ്രദേശങ്ങളിൽ പൊതുഗതാഗത ബസുകളെ ലക്ഷ്യമിട്ട് ട്രാഫിക് വിഭാഗം നടത്തിയ വ്യാപക പരിശോധനയിൽ 27 ബസുകൾ പിടിച്ചെടുക്കുകയും 364 ട്രാഫിക് നിയമലംഘനങ്ങൾ രേഖപ്പെടുത്തുകയും ചെയ്തു. നിയമലംഘനങ്ങളുമായി ബന്ധപ്പെട്ട് 27 പേരെ ട്രാഫിക് കസ്റ്റഡിയിലേക്ക് മാറ്റി.ജനറൽ ട്രാഫിക് ഡിപ്പാർട്ട്‌മെന്റ് ഡയറക്ടർ ജനറൽ ബ്രിഗേഡിയർ റാഷിദ് ഹമൂദ് അൽ ഹാജ്രി, ട്രാഫിക് റെഗുലേഷൻ അഫയേഴ്സ് അസിസ്റ്റന്റ് ഡയറക്ടർ ജനറൽ കേണൽ അയ്യൂബ് ഗാസി ഫത്തല്ല എന്നിവരുടെ മേൽനോട്ടത്തിലാണ് പരിശോധന നടത്തിയത്.യാത്രക്കാരെ കൊണ്ടുപോകുന്ന ബസുകൾ ട്രാഫിക് നിയമങ്ങളും സുരക്ഷാ മാനദണ്ഡങ്ങളും പാലിക്കുന്നുണ്ടോയെന്ന് ഉറപ്പുവരുത്തുന്നതിനായിരുന്നു പരിശോധന.
പരിശോധനയിൽ 338 പൊതുവായ ട്രാഫിക് നിയമലംഘനങ്ങളും വാഹനങ്ങൾ ഗതാഗത ആവശ്യങ്ങൾക്ക് ഉപയോഗിക്കുന്നതുമായി ബന്ധപ്പെട്ട 26 നിയമലംഘനങ്ങളും കണ്ടെത്തി. കൂടാതെ ഡ്രൈവിംഗ് ലൈസൻസില്ലാതെ വാഹനം ഓടിച്ചതിന് ഒരാൾക്കെതിരെയും നടപടി സ്വീകരിച്ചു.നിയമലംഘനങ്ങൾ കണ്ടെത്തിയ 27 ബസുകൾ അധികൃതർ പിടിച്ചെടുക്കുകയും 27 പേരെ തുടർ നിയമനടപടികൾക്കായി ട്രാഫിക് കസ്റ്റഡി കേന്ദ്രത്തിലേക്ക് മാറ്റുകയും ചെയ്തു.
റോഡ് സുരക്ഷ ഉറപ്പാക്കുന്നതിനും പൊതുഗതാഗത വാഹനങ്ങൾ നിയമങ്ങൾ പാലിക്കുന്നുണ്ടെന്ന് ഉറപ്പുവരുത്തുന്നതിനുമായി കുവൈത്തിന്റെ വിവിധ ഭാഗങ്ങളിൽ ട്രാഫിക് പരിശോധനകൾ ശക്തമാക്കുന്നതിന്റെ ഭാഗമായാണ് നടപടി.പൊതുഗതാഗത വാഹനങ്ങളിലെ നിയമലംഘനങ്ങൾ തടയുന്നതിനും യാത്രക്കാരുടെയും മറ്റ് റോഡ് ഉപയോക്താക്കളുടെയും സുരക്ഷ ഉറപ്പാക്കുന്നതിനും പരിശോധനകൾ തുടരുമെന്നാണ് അധികൃതരുടെ നിലപാട്.
