കുവൈത്ത് സിറ്റി: നെതർലൻഡ്സിൽ നിന്ന് കുവൈത്തിലേക്ക് അയച്ച ചോക്ലേറ്റിന്റെയും ബിസ്കറ്റിന്റെയും പാക്കറ്റുകൾക്കുള്ളിൽ ഒളിപ്പിച്ച നിലയിൽ മയക്കുമരുന്ന് കണ്ടെത്തി. കുവൈത്ത് അന്താരാഷ്ട്ര വിമാനത്താവളത്തിലെ എയർ കാർഗോ വിഭാഗത്തിൽ നടത്തിയ കസ്റ്റംസ് പരിശോധനയിലാണ് ഹാഷിഷും കൊക്കെയ്നുമാണെന്ന് സംശയിക്കുന്ന ലഹരിവസ്തുക്കൾ പിടിച്ചെടുത്തത്. സംഭവവുമായി ബന്ധപ്പെട്ട് ഒരാളെ അറസ്റ്റ് ചെയ്തു.മധുരപലഹാരങ്ങളും ചോക്ലേറ്റുകളും അടങ്ങിയതാണെന്ന് രേഖപ്പെടുത്തിയ പാർസലാണ് നെതർലൻഡ്സിൽ നിന്ന് എത്തിയത്. പതിവ് പരിശോധനയ്ക്കിടെ പാർസലിൽ സംശയം തോന്നിയ കസ്റ്റംസ് ഉദ്യോഗസ്ഥർ വിശദമായ പരിശോധന നടത്തുകയായിരുന്നു.
പരിശോധനയിൽ ഏകദേശം 126 ഗ്രാം ഭാരമുള്ള നാല് ഹാഷിഷ് കഷണങ്ങളും 11 ഗ്രാം കൊക്കെയ്നാണെന്ന് സംശയിക്കുന്ന വെളുത്ത പൊടിയും കണ്ടെത്തി. കസ്റ്റംസ് പരിശോധനയിൽ പിടിക്കപ്പെടാതിരിക്കാൻ ചോക്ലേറ്റിന്റെയും ബിസ്കറ്റിന്റെയും പാക്കറ്റുകൾക്കുള്ളിൽ അതീവ രഹസ്യമായാണ് ലഹരിവസ്തുക്കൾ ഒളിപ്പിച്ചിരുന്നത്.മയക്കുമരുന്ന് കണ്ടെത്തിയതിനെ തുടർന്ന് കസ്റ്റംസ് ഇൻവെസ്റ്റിഗേഷൻ ആൻഡ് സെർച്ച് ഓഫീസും ആഭ്യന്തര മന്ത്രാലയത്തിന് കീഴിലുള്ള മയക്കുമരുന്ന്, മദ്യ നിയന്ത്രണ വിഭാഗവും സംയുക്തമായി അന്വേഷണം നടത്തി. തുടർന്നാണ് സംഭവവുമായി ബന്ധപ്പെട്ട പ്രതിയെ പിടികൂടിയത്.
പിടിച്ചെടുത്ത ലഹരിവസ്തുക്കളും അറസ്റ്റിലായ പ്രതിയെയും തുടർ നിയമനടപടികൾക്കായി ബന്ധപ്പെട്ട അധികൃതർക്ക് കൈമാറി. സംഭവത്തിൽ ഔദ്യോഗിക റിപ്പോർട്ടും രജിസ്റ്റർ ചെയ്തിട്ടുണ്ട്.വിദേശത്തുനിന്ന് എത്തുന്ന പാർസലുകൾ വഴി മയക്കുമരുന്ന് കടത്താനുള്ള ശ്രമങ്ങൾ തടയുന്നതിൽ കസ്റ്റംസ് പരിശോധനയുടെ പ്രാധാന്യം വ്യക്തമാക്കുന്നതാണ് പുതിയ സംഭവം.
