കുവൈറ്റ് സിറ്റി: ഹവല്ലി ഗവർണറേറ്റിൽ സുരക്ഷ ശക്തമാക്കുന്നതിന്റെ ഭാഗമായി നടത്തിയ മൂന്ന് ദിവസത്തെ സംയുക്ത പരിശോധനയിൽ വിവിധ വകുപ്പുകളുടെ നേതൃത്വത്തിൽ 928 നടപടികൾ സ്വീകരിച്ചതായി കുവൈറ്റ് ആഭ്യന്തര മന്ത്രാലയം അറിയിച്ചു. സെക്യൂരിറ്റി ഡയറക്ടറേറ്റ്സ് അഫയേഴ്സ് സെക്ടർ മേധാവി ബ്രിഗേഡിയർ ജനറൽ അബ്ദുൽ അസീസ് ബന്ദർ അൽ-ഒമർ, ഹവല്ലി ഗവർണറേറ്റ് സെക്യൂരിറ്റി ഡയറക്ടർ ബ്രിഗേഡിയർ ജനറൽ ഹുസൈൻ മുഹമ്മദ് ദാഷ്തി, അസിസ്റ്റന്റ് ഡയറക്ടർ ജനറൽ ബ്രിഗേഡിയർ ജനറൽ മുഹമ്മദ് ഫാരിസ് അൽ-മുഅസ്സബ് എന്നിവരുടെ മേൽനോട്ടത്തിലായിരുന്നു പരിശോധന നടത്തിയത്.
ജനറൽ ഫയർ ഫോഴ്സ്, കുവൈറ്റ് മുനിസിപ്പാലിറ്റി, പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രിഷൻ, വാണിജ്യ-വ്യവസായ മന്ത്രാലയം എന്നിവയുടെ സഹകരണത്തോടെയാണ് ക്യാമ്പെയ്ൻ സംഘടിപ്പിച്ചത്. പിടികിട്ടാപ്പുള്ളികളെയും നിയമലംഘകരെയും കണ്ടെത്തുക, ഗതാഗത ക്രമീകരണങ്ങൾ മെച്ചപ്പെടുത്തുക എന്നിവയായിരുന്നു പരിശോധനയുടെ ലക്ഷ്യം.പരിശോധനയുടെ ഭാഗമായി ഹവല്ലി സെക്യൂരിറ്റി ഡയറക്ടറേറ്റിന്റെ നേതൃത്വത്തിൽ മാത്രം 758 നടപടികളാണ് സ്വീകരിച്ചത്. മുനിസിപ്പാലിറ്റി, വാണിജ്യ മന്ത്രാലയം, ഫയർ ഫോഴ്സ്, ഫുഡ് അതോറിറ്റി എന്നിവയുൾപ്പെടെയുള്ള മറ്റ് ഏജൻസികളുടെ പ്രവർത്തനങ്ങൾ കൂടി ചേർത്താണ് മൊത്തം 928 നടപടികൾ പൂർത്തിയാക്കിയത്.
പരിശോധനയിൽ കണ്ടെത്തിയ പ്രധാന വിവരങ്ങൾ താഴെ പറയുന്നവയാണ്:
* 84 ട്രാഫിക് നിയമലംഘനങ്ങൾ* 20 മാനുഷിക സഹായ കേസുകൾ* 66 റെസിഡൻസി നിയമലംഘനങ്ങൾ* 10 സുരക്ഷാ ചെക്ക്പോസ്റ്റുകളും ഫീൽഡ് പ്രവർത്തനങ്ങളും* 7 ഒളിവിൽ കഴിഞ്ഞവർ* ലഹരിമരുന്നുകളുമായി പിടിയിലായ 4 പേർ* ക്രിമിനൽ കേസുകളിൽ അന്വേഷണം നേരിടുന്ന 4 പ്രതികൾ* നിരോധിത ലഹരിവസ്തുക്കളുമായി പിടിയിലായ 4 പേർ* ഉപേക്ഷിക്കപ്പെട്ട നിലയിൽ കണ്ടെത്തിയ 8 വാഹനങ്ങൾ നീക്കം ചെയ്തു* റെസിഡൻസി, ലേബർ നിയമങ്ങൾ ലംഘിച്ച 33 പേർ* അനധികൃത തൊഴിൽ മേഖലയുമായി ബന്ധപ്പെട്ട 16 വ്യക്തികൾ* പിടികിട്ടാപ്പുള്ളികളായ പ്രതികൾ ഉൾപ്പെട്ട 9 സിവില്‍ കേസുകൾ* അധികൃതർ അന്വേഷിക്കുന്ന 6 സാധാരണക്കാർ* തിരിച്ചറിയൽ രേഖകളില്ലാതെ പിടിക്കപ്പെട്ട 4 പേർ* അറസ്റ്റ് വാറണ്ടുള്ള 3 പേർ നിയമലംഘനങ്ങൾ നടത്തിയ മുഴുവൻ പേർക്കുമെതിരെ അതത് വകുപ്പുകളുടെ നിയമപ്രകാരമുള്ള കർശന നടപടികൾ സ്വീകരിച്ചിട്ടുണ്ടെന്ന് ആഭ്യന്തര മന്ത്രാലയം വ്യക്തമാക്കി. രാജ്യത്തിന്റെ സുരക്ഷ ഉറപ്പാക്കുന്നതിനും ഇത്തരം നിയമവിരുദ്ധ പ്രവർത്തനങ്ങൾ തടയുന്നതിനുമുള്ള പരിശോധനകൾ തുടരുമെന്നും അധികൃതർ കൂട്ടിച്ചേർത്തു.
