കുവൈത്ത് സിറ്റി, നവംബർ 15: കുവൈത്തിൽ നിർബന്ധിത വാഹന ഇൻഷുറൻസ് പോളിസികൾ നൽകാൻ അനുമതിയുള്ള കമ്പനികളുടെ പട്ടികയിൽ നിന്ന് രണ്ട് ഇൻഷുറൻസ് കമ്പനികളെ ഒഴിവാക്കി. ഇൻഷുറൻസ് റെഗുലേറ്ററി യൂണിറ്റാണ് ഇതുസംബന്ധിച്ച പുതിയ തീരുമാനം പുറത്തിറക്കിയത്. ഇതോടെ രാജ്യത്ത് നിർബന്ധിത വാഹന ഇൻഷുറൻസ് നൽകാൻ അംഗീകാരമുള്ള കമ്പനികളുടെ എണ്ണം 25 ആയി.തആസുർ തകാഫുൽ ഇൻഷുറൻസ് കമ്പനി (Ta’azur Takaful Insurance Company), അറബ് ഇസ്ലാമിക് തകാഫുൽ ഇൻഷുറൻസ് കമ്പനി (Arab Islamic Takaful Insurance Company) എന്നിവയെയാണ് അംഗീകൃത പട്ടികയിൽ നിന്ന് നീക്കിയത്.
ഇരു കമ്പനികളുടെയും ഇൻഷുറൻസ് പ്രവർത്തനങ്ങൾ നേരത്തെ താൽക്കാലികമായി നിർത്തിവെച്ചതിനെ തുടർന്നാണ് പുതിയ നടപടി. ഇൻഷുറൻസ് മേഖലയിലെ നിയമങ്ങളും നിയന്ത്രണങ്ങളും പാലിക്കുന്നതിൽ വീഴ്ച വരുത്തിയതിനെ തുടർന്ന് കമ്പനികൾക്ക് അധികൃതർ നേരത്തെ മുന്നറിയിപ്പ് നൽകിയിരുന്നു. എന്നാൽ അനുവദിച്ച സമയത്തിനുള്ളിൽ നിയമലംഘനങ്ങൾ പരിഹരിക്കാത്ത സാഹചര്യത്തിലാണ് പ്രവർത്തനങ്ങൾ നിർത്തിവെക്കാൻ തീരുമാനിച്ചത്.ഇൻഷുറൻസ് റെഗുലേറ്ററി യൂണിറ്റ് മേധാവി മുഹമ്മദ് സുലൈമാൻ അൽ ഒതൈബി നവംബർ ഒമ്പതിന് പുറത്തിറക്കിയ 2026-ലെ അഞ്ചാം നമ്പർ തീരുമാനമാണ് ഔദ്യോഗിക ഗസറ്റായ കുവൈത്ത് അൽ യൗമിൽ പ്രസിദ്ധീകരിച്ചത്.
പുതുക്കിയ പട്ടികയിൽ കുവൈത്ത് ഇൻഷുറൻസ് കമ്പനി, ഗൾഫ് ഇൻഷുറൻസ് ഗ്രൂപ്പ്, അൽ അഹ്‌ലിയ ഇൻഷുറൻസ്, വാർബ ഇൻഷുറൻസ്, ബൂബിയാൻ തകാഫുൽ, കുവൈത്ത് ഖത്തർ ഇൻഷുറൻസ്, ബർഗാൻ തകാഫുൽ, ലിവ ഇൻഷുറൻസ് തുടങ്ങിയ 25 കമ്പനികൾ ഉൾപ്പെടുന്നു.അതേസമയം, പ്രവർത്തനം നിർത്തിവെച്ച രണ്ട് കമ്പനികളും നേരത്തെ നൽകിയ ഇൻഷുറൻസ് പോളിസികൾ ഈ തീരുമാനത്തെ തുടർന്ന് സ്വമേധയാ റദ്ദാകില്ലെന്ന് ഇൻഷുറൻസ് റെഗുലേറ്ററി യൂണിറ്റ് വ്യക്തമാക്കി. നിലവിലുള്ള പോളിസികളുമായി ബന്ധപ്പെട്ട ഉപഭോക്താക്കളുടെ അവകാശങ്ങളും ഇൻഷുറൻസ് ക്ലെയിമുകളും ഉൾപ്പെടെയുള്ള നിയമപരവും കരാർപരവുമായ ബാധ്യതകൾ കമ്പനികൾ തുടർന്നും നിറവേറ്റണം.
വാഹന ഉടമകൾ പുതിയ ഇൻഷുറൻസ് എടുക്കുമ്പോഴും നിലവിലുള്ള പോളിസികൾ പുതുക്കുമ്പോഴും ബന്ധപ്പെട്ട കമ്പനി അംഗീകൃത പട്ടികയിൽ ഉൾപ്പെട്ടിട്ടുണ്ടെന്ന് ഉറപ്പുവരുത്തുന്നത് പ്രധാനമാണ്.ഇൻഷുറൻസ് മേഖലയിലെ നിയമലംഘനങ്ങൾ തടയുന്നതിനും ഉപഭോക്താക്കളുടെ അവകാശങ്ങൾ സംരക്ഷിക്കുന്നതിനും കമ്പനികളുടെ പ്രവർത്തനങ്ങളിൽ കൂടുതൽ സുതാര്യത ഉറപ്പാക്കുന്നതിനുമാണ് പുതിയ നടപടിയെന്ന് അധികൃതർ അറിയിച്ചു.
