കുവൈത്ത് സിറ്റി, സെപ്റ്റംബർ 28: കുവൈത്തിൽ പുകവലി ഉപേക്ഷിക്കുന്നവരുടെ നിരക്ക് വർധിച്ചതായി കുവൈത്ത് ആന്റി-സ്മോക്കിംഗ് ആൻഡ് കാൻസർ സൊസൈറ്റി ചെയർമാൻ ഡോ. ഖാലിദ് അൽ-സാലിഹ് അറിയിച്ചു.2024-ൽ 7 ശതമാനമായിരുന്ന പുകവലി ഉപേക്ഷിക്കൽ നിരക്ക് നിലവിൽ 9 ശതമാനമായി ഉയർന്നതായി അദ്ദേഹം വ്യക്തമാക്കി. പുകവലി നിർത്താൻ ആഗ്രഹിക്കുന്നവർക്ക് തുടർച്ചയായ വിദഗ്ധ സഹായവും പിന്തുണയും നൽകേണ്ടതിന്റെ പ്രാധാന്യമാണ് ഈ വർധന വ്യക്തമാക്കുന്നതെന്നും അദ്ദേഹം പറഞ്ഞു.
യുവാക്കളിലും കൗമാരക്കാരിലും നിക്കോട്ടിൻ പൗച്ചുകളുടെ ഉപയോഗം വർധിക്കുന്നതിനെക്കുറിച്ചും അദ്ദേഹം മുന്നറിയിപ്പ് നൽകി. ആകർഷകമായ ഫ്ലേവറുകൾ, പാക്കേജിംഗ്, സോഷ്യൽ മീഡിയ, ഇൻഫ്ലുവൻസർമാർ എന്നിവ ഉപയോഗിച്ചുള്ള നിക്കോട്ടിൻ ഉൽപ്പന്നങ്ങളുടെ പ്രചാരണത്തെക്കുറിച്ച് ജാഗ്രത പാലിക്കണമെന്നും ആവശ്യപ്പെട്ടു.പുകവലി ഉപേക്ഷിക്കാൻ ആഗ്രഹിക്കുന്നവർ Smoking Cessation Clinic-ന്റെ സേവനങ്ങളും വിദഗ്ധ മാർഗനിർദേശവും പ്രയോജനപ്പെടുത്തണമെന്നും ഡോ. അൽ-സാലിഹ് അഭ്യർത്ഥിച്ചു.
