കുവൈത്ത് സിറ്റി, മേയ് 29: അൽ സൂർ ബീച്ചിൽ കുടുംബത്തോടൊപ്പം കടലിൽ കുളിക്കുകയായിരുന്ന 11 വയസ്സുള്ള കുവൈത്തി പെൺകുട്ടിയെ സ്രാവ് ആക്രമിച്ചതായി സംശയം.
പ്രദേശവാസികളുടെയും ദൃക്സാക്ഷികളുടെയും വിവരമനുസരിച്ച് ചെറിയ റീഫ് ഷാർക്കാണ് കുട്ടിയെ ആക്രമിച്ചതെന്നാണ് കരുതുന്നത്.
സംഭവത്തിൽ കുട്ടിക്ക് പരിക്കേറ്റെങ്കിലും ജീവന് ഭീഷണിയില്ലെന്നാണ് റിപ്പോർട്ട്. സംഭവം നടന്നതോടെ ബീച്ചിലുണ്ടായിരുന്നവരിൽ പരിഭ്രാന്തി പടർന്നു, ബീച്ചിലുണ്ടായിരുന്ന ആളുകൾ കരയിലേക്ക് നീന്തിക്കയറി.
അടിയന്തര സേവന വിഭാഗങ്ങളും ആംബുലൻസ് സംഘവും സ്ഥലത്തെത്തി കുട്ടിക്ക് പ്രാഥമിക ചികിത്സ നൽകി ആശുപത്രിയിലേക്ക് മാറ്റി. സംഭവത്തിന്റെ സാഹചര്യങ്ങൾ അധികൃതർ പരിശോധിച്ചുവരികയാണ്.
ആക്രമണത്തിൽ ഉൾപ്പെട്ടത് ഏത് ഇനത്തിലുള്ള സ്രാവാണെന്നതും പരിക്കുകളുടെ കൃത്യമായ വിവരങ്ങളും ഇതുവരെ ഔദ്യോഗികമായി പുറത്തുവിട്ടിട്ടില്ല. സംഭവത്തെ തുടർന്ന് ബീച്ച് മേഖലയിൽ നിരീക്ഷണം ശക്തമാക്കുകയും അന്വേഷണം ആരംഭിക്കുകയും ചെയ്തിട്ടുണ്ട്.
