കുവൈറ്റ് സിറ്റി: കുവൈറ്റിലെ ചരിത്രപ്രസിദ്ധമായ ഫൈലക്ക ദ്വീപിൽ പുരാതന ദിൽമുൻ നാഗരികതയുടേതെന്ന് കരുതുന്ന അപൂർവ്വ മുദ്രകൾ കണ്ടെത്തി. കുവൈറ്റ്-ഡാനിഷ്, കുവൈറ്റ്-സ്ലോവാക് സംയുക്ത പുരാവസ്തു ഗവേഷണ സംഘങ്ങളാണ് ഈ ചരിത്ര കണ്ടെത്തലിന് പിന്നിൽ. നാഷണൽ കൗൺസിൽ ഫോർ കൾച്ചർ, ആർട്സ് ആൻഡ് ലെറ്റേഴ്സ് മുൻ ആർക്കിയോളജി വിഭാഗം ഡയറക്ടർ ഡോ. സുൽത്താൻ അൽ ദുവൈഷ് ആണ് വിവരങ്ങൾ വ്യക്തമാക്കിയത്.
ഈജിപ്ഷ്യൻ, സുമേറിയൻ, അക്കാഡിയൻ, മഗൻ (Magan) നാഗരികതകൾക്കൊപ്പം പ്രാചീന ലോകത്തിലെ അഞ്ച് മഹത്തായ നാഗരികതകളിൽ ഒന്നാണ് ദിൽമുൻ നാഗരികതയെന്ന് അദ്ദേഹം അഭിപ്രായപ്പെട്ടു. യു.എ.ഇ, ബഹ്റൈൻ, സൗദി അറേബ്യ, കുവൈറ്റ് എന്നീ രാജ്യങ്ങളിൽ തങ്ങളുടെ പ്രധാന വ്യാപാര കേന്ദ്രങ്ങൾ സ്ഥാപിച്ച ഒരു പ്രമുഖ വാണിജ്യ നാഗരികതയായിരുന്നു ദിൽമുൻ.
ഫൈലക്കയിൽ നിന്ന് കണ്ടെടുത്ത രണ്ട് മുദ്രകളിൽ മെസൊപ്പൊട്ടേമിയൻ സംസ്കാരത്തിന് സമാനമായ വീണയുടെ ചിത്രങ്ങൾ കൊത്തിവെച്ചിട്ടുണ്ട്. അറേബ്യൻ ഗൾഫ് മേഖലയിൽ ഇത്തരമൊരു കൊത്തുപണി കണ്ടെത്തുന്നത് ഇതാദ്യമാണ്.പുരാതന കാലത്ത് മെസൊപ്പൊട്ടേമിയയുമായും മറ്റ് അയൽപക്ക നാഗരികതകളുമായും കുവൈറ്റിനുണ്ടായിരുന്ന സാംസ്കാരിക, വാണിജ്യ ബന്ധങ്ങളുടെ ശക്തമായ തെളിവാണ് ഈ കണ്ടെത്തൽ.
