കുവൈത്ത് സിറ്റി: കുവൈത്തിൽ ലഹരിമരുന്നുകളുടെയും മദ്യത്തിന്റെയും അനധികൃത വ്യാപാരത്തിനെതിരെ ആഭ്യന്തര മന്ത്രാലയം നടത്തിയ പ്രത്യേക പരിശോധനകളിൽ നാല് പേർ അറസ്റ്റിലായി. നാല് വ്യത്യസ്ത കേസുകളിലായാണ് ജനറൽ ഡിപ്പാർട്ട്‌മെന്റ് ഫോർ ഡ്രഗ് കൺട്രോൾ പ്രതികളെ പിടികൂടിയത്.ലഹരിമരുന്നുകളും മാനസികാവസ്ഥയെ ബാധിക്കുന്ന നിരോധിത വസ്തുക്കളും മദ്യവും വിൽപ്പന നടത്തിയെന്ന സംശയത്തെ തുടർന്നാണ് പ്രതികൾക്കെതിരെ നടപടിയെടുത്തത്.
പരിശോധനകളിൽ ഒരു കിലോഗ്രാം കഞ്ചാവ്, ഒരു കിലോഗ്രാം കൊക്കെയ്ൻ, ആയിരം ക്യാപ്റ്റഗൺ ഗുളികകൾ, 80 ഗ്രാം മെത്താംഫെറ്റമിൻ എന്നിവ പിടിച്ചെടുത്തു.ഇതിനുപുറമെ, സിന്തറ്റിക് കന്നാബിനോയിഡ് എന്ന ലഹരിപദാർത്ഥം കലർത്തിയ 11 എ-ഫോർ പേപ്പർ ഷീറ്റുകളും 97 കുപ്പി മദ്യവും അധികൃതർ കണ്ടെടുത്തു. ലഹരിവസ്തുക്കളുടെ വിൽപ്പനയിലൂടെ ലഭിച്ചതെന്ന് സംശയിക്കുന്ന 520 കുവൈത്ത് ദിനാറും പിടിച്ചെടുത്തിട്ടുണ്ട്.
അറസ്റ്റിലായ നാല് പ്രതികളെയും പിടിച്ചെടുത്ത ലഹരിവസ്തുക്കളും മറ്റ് തെളിവുകളും തുടർ നിയമനടപടികൾക്കായി ബന്ധപ്പെട്ട അധികാരികൾക്ക് കൈമാറി.രാജ്യത്ത് ലഹരിമരുന്ന് കടത്തും അനധികൃത വിൽപ്പനയും തടയുന്നതിനായി സുരക്ഷാ പരിശോധനകളും നിരീക്ഷണവും ശക്തമായി തുടരുമെന്ന് കുവൈത്ത് ആഭ്യന്തര മന്ത്രാലയം അറിയിച്ചു.ലഹരിമരുന്ന് ശൃംഖലകളെ കണ്ടെത്തുന്നതിനും ഇത്തരം നിയമവിരുദ്ധ പ്രവർത്തനങ്ങളിൽ ഏർപ്പെടുന്നവർക്കെതിരെ കർശന നടപടി സ്വീകരിക്കുന്നതിനുമുള്ള സുരക്ഷാ പ്രവർത്തനങ്ങളുടെ ഭാഗമായാണ് പുതിയ അറസ്റ്റുകൾ.
