കുവൈത്ത് സിറ്റി, ജൂലൈ 19: കുവൈത്ത് എയർവേയ്സിന്റെ ഒരു വിമാനവും റദ്ദാക്കിയിട്ടില്ലെന്നും, കമ്പനിയുടെ എല്ലാ നേരിട്ടുള്ള സർവീസുകളും അംഗീകൃത ഷെഡ്യൂൾ പ്രകാരം സാധാരണ രീതിയിൽ തുടരുകയാണെന്നും ആക്ടിംഗ് ചീഫ് എക്സിക്യൂട്ടീവ് ഓഫീസർ അബ്ദുൽവഹാബ് ഇബ്രാഹിം അൽ-ഷത്തി വ്യക്തമാക്കി.കഴിഞ്ഞ ശനിയാഴ്ച ചില വിമാനങ്ങളുടെ സമയക്രമം മാത്രം അസാധാരണ പ്രവർത്തന സാഹചര്യങ്ങളും കുവൈത്ത് അന്താരാഷ്ട്ര വിമാനത്താവളത്തിലെ താൽക്കാലിക ടേക്ക് ഓഫ്-ലാൻഡിംഗ് നിയന്ത്രണവും കാരണം മാറ്റിയതാണെന്നും അദ്ദേഹം പറഞ്ഞു. യാത്രക്കാരുടെ സുരക്ഷയും സർവീസുകളുടെ തുടർച്ചയും ഉറപ്പാക്കുന്നതിനായാണ് ഈ നടപടി സ്വീകരിച്ചതെന്നും അദ്ദേഹം കൂട്ടിച്ചേർത്തു.
ഓപ്പറേഷൻ, ടെക്നിക്കൽ, അഡ്മിനിസ്ട്രേറ്റീവ് വിഭാഗങ്ങൾ 24 മണിക്കൂറും പ്രവർത്തിച്ച് ബാധിച്ച വിമാനങ്ങൾ അതിവേഗം പുനഃക്രമീകരിച്ചതായും, ഇതിന്റെ ഫലമായി അടുത്ത ദിവസത്തെ സർവീസുകൾക്ക് യാതൊരു തടസവും ഉണ്ടായില്ലെന്നും അൽ-ഷത്തി പറഞ്ഞു.പ്രാദേശിക വ്യോമഗതാഗത സാഹചര്യങ്ങൾ കുവൈത്ത് എയർവേയ്സ് തുടർച്ചയായി നിരീക്ഷിച്ചുകൊണ്ടിരിക്കുകയാണെന്നും, ബന്ധപ്പെട്ട അധികൃതരുമായി സഹകരിച്ച് സുരക്ഷാ മാനദണ്ഡങ്ങൾ പാലിച്ചുകൊണ്ട് ആവശ്യമായ പ്രവർത്തന പദ്ധതികൾ നടപ്പിലാക്കുന്നുണ്ടെന്നും അദ്ദേഹം അറിയിച്ചു.
മറ്റ് ചില എയർലൈൻ കമ്പനികൾക്ക് വിമാനങ്ങൾ റദ്ദാക്കുകയോ സമയക്രമം മാറ്റുകയോ ചെയ്യേണ്ടിവന്ന സാഹചര്യത്തിലും, കുവൈത്ത് എയർവേയ്സ് ഒരു സർവീസും റദ്ദാക്കാതെ പുനഃക്രമീകരണത്തിലൂടെ സർവീസുകൾ വിജയകരമായി തുടർന്നുവെന്ന് അദ്ദേഹം വ്യക്തമാക്കി.യാത്രക്കാർ ഏറ്റവും പുതിയ വിവരങ്ങൾ അറിയുന്നതിനായി കുവൈത്ത് എയർവേയ്സിന്റെ ഔദ്യോഗിക ചാനലുകൾ മാത്രം പിന്തുടരണമെന്നും, ടിക്കറ്റ് ബുക്ക് ചെയ്യുമ്പോൾ മൊബൈൽ നമ്പറും ഇ-മെയിൽ വിലാസവും ഉൾപ്പെടെയുള്ള ബന്ധപ്പെടാനുള്ള വിവരങ്ങൾ കൃത്യമായി നൽകണമെന്നും അദ്ദേഹം അഭ്യർഥിച്ചു.
