കുവൈറ്റ് സിറ്റി: കിരീടാവകാശിയായി ഹിസ് ഹൈനസ് ഷെയ്ഖ് സബാഹ് ഖാലിദ് അൽ-ഹമദ് അൽ-സബാഹ് ചുമതലയേറ്റതിന്റെ രണ്ടാം വാർഷിക വേളയിൽ ആശംസകൾ നേർന്ന് കുവൈറ്റ് അമീർ ഷെയ്ഖ് മിഷാൽ അൽ-അഹമ്മദ് അൽ-ജാബർ അൽ-സബാഹ്. രാജ്യത്തിന്റെ പുരോഗതിക്കും ഐശ്വര്യത്തിനും കിരീടാവകാശി നൽകിവരുന്ന സംഭാവനകളെയും അദ്ദേഹത്തിന്റെ നേതൃപാടവത്തെയും പ്രകീർത്തിച്ചുകൊണ്ട് ഹൃദ്യമായ സന്ദേശമാണ് അമീർ അയച്ചിരിക്കുന്നത്.
പ്രിയപ്പെട്ട മാതൃരാജ്യത്തിന്റെ സമൃദ്ധി വർദ്ധിപ്പിക്കുന്നതിനും ആഗോളതലത്തിൽ കുവൈറ്റിന്റെ പദവി ഉയർത്തുന്നതിനും കിരീടാവകാശി വഹിക്കുന്ന പയനിയറിംഗ് റോളിനെ രാജ്യം ഏറെ ആദരവോടെയാണ് നോക്കിക്കാണുന്നതെന്ന് അമീർ തന്റെ സന്ദേശത്തിൽ വ്യക്തമാക്കി.രാജ്യം ഏറെ നെഞ്ചിലേറ്റുന്ന ഈ ദേശീയ സുദിനത്തിൽ ഷെയ്ഖ് സബാഹ് ഖാലിദിന്റെ ഔദ്യോഗിക ജീവിതത്തെയും അദ്ദേഹം ജനങ്ങളോട് കാണിക്കുന്ന പ്രതിബദ്ധതയെയും അമീർ പ്രത്യേകം അഭിനന്ദിച്ചു.
കർത്തവ്യങ്ങൾ പൂർണ്ണമായ ഉത്തരവാദിത്തത്തോടെ നിർവ്വഹിക്കുന്നതിലും രാജ്യത്തോടുള്ള സമർപ്പണത്തിലും കിരീടാവകാശി പുലർത്തുന്ന ആത്മാർത്ഥത അദ്ദേഹത്തിന്റെ ഭരണജീവിതത്തിന്റെ സവിശേഷതയാണ്. ഈ ഉദാത്തമായ ഗുണങ്ങളും തത്വങ്ങളുമാണ് കുവൈറ്റിലെ ജനങ്ങൾക്ക് അദ്ദേഹത്തോടുള്ള സ്നേഹവും ബഹുമാനവും വർദ്ധിപ്പിച്ചത്. മാതൃരാജ്യത്തിന്റെയും അതിന്റെ വിശ്വസ്തരായ മക്കളുടെയും ഉന്നമനത്തിനായി അദ്ദേഹം നടത്തുന്ന എല്ലാ നല്ല ശ്രമങ്ങളിലും കുവൈറ്റ് ജനതയ്ക്ക് വലിയ അഭിമാനമുണ്ടെന്നും അമീർ കൂട്ടിച്ചേർത്തു.
