കുവൈറ്റ് സിറ്റി: ശനിയാഴ്ച പുലർച്ചെയോടെ കുവൈറ്റിന്റെ സുരക്ഷയ്ക്കും മേഖലയുടെ സ്ഥിരതയ്ക്കും കടുത്ത ഭീഷണിയുയർത്തി ഉണ്ടായ പുതിയ സൈനിക നീക്കത്തിന് പിന്നാലെ, ഇറാന്റെ ആവർത്തിച്ചുള്ള ആക്രമണങ്ങളെ ശക്തമായ ഭാഷയിൽ അപലപിച്ച് കുവൈറ്റ് വിദേശകാര്യ മന്ത്രാലയം രംഗത്തെത്തി. ഇത്തരം ശത്രുതാപരമായ നടപടികൾ അവസാനിപ്പിക്കാനുള്ള അന്താരാഷ്ട്ര സമൂഹത്തിന്റെ ആവർത്തിച്ചുള്ള ആവശ്യങ്ങളെ ഇറാൻ പൂർണ്ണമായി അവഗണിക്കുകയാണെന്ന് ഔദ്യോഗിക പ്രസ്താവനയിലൂടെ മന്ത്രാലയം കുറ്റപ്പെടുത്തി.
സാധാരണക്കാരായ പൗരന്മാരുടെയും താമസക്കാരുടെയും ജീവന് ഭീഷണിയുയർത്തുന്നതിലും ഗൾഫ് മേഖലയുടെ സുരക്ഷ തകർക്കുന്നതിലും ഇറാൻ തികഞ്ഞ ഉദാസീനതയാണ് കാണിക്കുന്നതെന്നും കുവൈറ്റ് ആരോപിച്ചു. ഇറാന്റെ ഈ പുതിയ നീക്കങ്ങൾ കുവൈറ്റിന്റെ പരമാധികാരത്തിന്മേലും ദേശീയ സുരക്ഷയ്ക്ക് മേലുമുള്ള കടുത്ത ലംഘനമാണ്. അന്താരാഷ്ട്ര നിയമങ്ങളുടെയും യുഎൻ ചാർട്ടറിന്റെയും ലംഘനത്തിന് പുറമെ, ഈ വർഷം (2026) പാസാക്കിയ യുഎൻ രക്ഷാസമിതിയുടെ ‘പ്രമേയം 2817’-ന്റെ പരസ്യമായ ലംഘനം കൂടിയാണ് ഇറാന്റെ ഭാഗത്തുനിന്നുണ്ടായിരിക്കുന്നത്.
പശ്ചിമേഷ്യയിലെ യുദ്ധസാഹചര്യങ്ങൾ ലഘൂകരിക്കാനും സ്ഥിരത വീണ്ടെടുക്കാനും അന്താരാഷ്ട്ര തലത്തിൽ ശക്തമായ ശ്രമങ്ങൾ നടക്കുന്ന ഈ ഘട്ടത്തിൽ, ഇറാന്റെ ഭാഗത്തുനിന്നുള്ള ഇത്തരം ആക്രമണങ്ങൾ സ്ഥിതിഗതികൾ കൂടുതൽ വഷളാക്കുമെന്നും മന്ത്രാലയം മുന്നറിയിപ്പ് നൽകി.ഇത്തരം അധിനിവേശങ്ങളെ ഒരു സാഹചര്യത്തിലും അംഗീകരിക്കാനോ ന്യായീകരിക്കാനോ സാധിക്കില്ലെന്ന് കുവൈറ്റ് വിദേശകാര്യ മന്ത്രാലയം ആവർത്തിച്ചു വ്യക്തമാക്കി.
