കുവൈറ്റ് സിറ്റി: റോഡുകളിൽ ട്രെയിലറുകളോ ബോട്ടുകൾ ഉൾപ്പെടെയുള്ള മറ്റ് സമുദ്ര വാഹനങ്ങളോ കെട്ടിവലിച്ചുകൊണ്ട് പോകുന്ന വാഹന ഉടമകൾക്കായി പുതിയ സുരക്ഷാ നിർദ്ദേശങ്ങളും ഓർമ്മപ്പെടുത്തലുകളുമായി കുവൈറ്റ് ട്രാഫിക് ഡിപ്പാർട്ട്മെന്റ്. റോഡ് സുരക്ഷ ഉറപ്പാക്കുന്നതിനും അപകടങ്ങൾ ഒഴിവാക്കുന്നതിനുമായി ഇത്തരം വാഹനങ്ങൾ കർശനമായ സുരക്ഷാ മാനദണ്ഡങ്ങൾ പാലിക്കണമെന്ന് അധികൃതർ ആവശ്യപ്പെട്ടു.മറ്റ് വാഹനങ്ങളോ ട്രെയിലറുകളോ കെട്ടിവലിക്കുന്ന വാഹനങ്ങൾ റോഡിൽ പരമാവധി 80 കിലോമീറ്റർ/മണിക്കൂർ വേഗത മാത്രമേ പാലിക്കാൻ പാടുള്ളൂ.
ഇത്തരം വാഹനങ്ങൾ എപ്പോഴും റോഡിന്റെ ഏറ്റവും വലതുവശത്തെ ട്രാക്കിലൂടെ മാത്രമേ സഞ്ചരിക്കാവൂ. ആവശ്യമായ സുരക്ഷാ ഉപകരണങ്ങൾ, പ്രതിഫലന ടേപ്പുകൾ എന്നിവ വാഹനത്തിലുണ്ടായിരിക്കണം. കൂടാതെ കണക്ട് ചെയ്തിരിക്കുന്ന എല്ലാ ലൈറ്റുകളും കൃത്യമായി പ്രവർത്തിക്കുന്നുണ്ടെന്ന് ഉറപ്പാക്കുകയും വേണം.ഒരു വാഹനത്തിന് പിന്നിൽ ഒന്നിൽക്കൂടുതൽ സമുദ്ര വാഹനങ്ങൾ ഒരേസമയം കെട്ടിവലിച്ചുകൊണ്ട് പോകാൻ പാടുള്ളതല്ല.
ഈ ട്രാഫിക് നിയമങ്ങൾ ലംഘിക്കുന്ന വാഹനങ്ങൾക്കെതിരെ കടുത്ത നടപടിയുണ്ടാകുമെന്നും അധികൃതർ മുന്നറിയിപ്പ് നൽകി. നിയമലംഘനം നടത്തുന്ന വാഹനങ്ങളും അവയോടൊപ്പം കെട്ടിവലിച്ചിരിക്കുന്ന ട്രെയിലറുകളോ ബോട്ടുകളോ ട്രാഫിക് നിയമത്തിലെ എക്സിക്യൂട്ടീവ് റെഗുലേഷൻസ് ആർട്ടിക്കിൾ 207 പ്രകാരം 60 ദിവസത്തേക്ക് പോലീസ് പിടിച്ചെടുക്കും. കടുത്ത നിയമനടപടികളും പിഴയും ഒഴിവാക്കുന്നതിനായി എല്ലാ ഡ്രൈവർമാരും ഈ സുരക്ഷാ നിർദ്ദേശങ്ങൾ കൃത്യമായി പാലിക്കണമെന്ന് ട്രാഫിക് വകുപ്പ് അഭ്യർത്ഥിച്ചു.
