കുവൈറ്റ് സിറ്റി: നിലവിലെ പശ്ചിമേഷ്യൻ സങ്കീർണ്ണ സാഹചര്യങ്ങളുടെ പശ്ചാത്തലത്തിൽ, കുവൈറ്റിന് മാനുഷിക പിന്തുണയും ഐക്യദാർഢ്യവും പ്രഖ്യാപിച്ച് ബംഗ്ലാദേശ് സർക്കാർ. കുവൈറ്റിലെ ജനങ്ങൾക്കുള്ള സൗഹൃദ സമ്മാനമായി ബംഗ്ലാദേശ് നൽകുന്ന അത്യാവശ്യ ഭക്ഷ്യവസ്തുക്കളുടെ ആദ്യ ഘട്ടം 2026 മേയ് 25 തിങ്കളാഴ്ച കുവൈറ്റിൽ എത്തും.
മേഖലയിലെ യുദ്ധാന്തരീക്ഷം കണക്കിലെടുത്ത് കുവൈറ്റിന്റെ അവശ്യസാധനങ്ങളുടെ തന്ത്രപ്രധാനമായ സംഭരണം ശക്തമാക്കുക എന്ന ലക്ഷ്യത്തോടെയാണ് ബംഗ്ലാദേശിന്റെ ഈ നിർണായക നീക്കം.വരും ദിവസങ്ങളിലായി വിവിധ വിമാന സർവീസുകളിലൂടെ ആകെ 240 ടൺ അവശ്യ ഭക്ഷ്യസാധനങ്ങളാണ് ബംഗ്ലാദേശ് കുവൈറ്റിലെത്തിക്കുക. ഇതിന്റെ തുടക്കമാണ് മേയ് 25-ലെ ആദ്യ ഷിപ്മെന്റ്. പ്രാദേശികമായ അനിശ്ചിതത്വങ്ങൾക്കിടയിലും കുവൈറ്റിനൊപ്പം ഉറച്ചുനിൽക്കുമെന്ന ബംഗ്ലാദേശിന്റെ പ്രഖ്യാപനമാണിത്. ഇരു സൗഹൃദ രാജ്യങ്ങളും തമ്മിലുള്ള ശക്തമായ ഉഭയകക്ഷി പങ്കാളിത്തവും പരസ്പര വിശ്വാസവും സഹകരണവും ഈ നടപടിയിലൂടെ ഒരിക്കൽ കൂടി അടിവരയിടുന്നു.
ഭക്ഷ്യശേഖരം ഔദ്യോഗികമായി കുവൈറ്റ് അധികൃതർക്ക് കൈമാറുന്നതിനായി ബംഗ്ലാദേശ് പ്രധാനമന്ത്രിയുടെ പ്രത്യേക ദൂതനും വിദേശകാര്യ ഉപദേശകനുമായ ബഹുമാനപ്പെട്ട ഹുമായൂൺ കബീറിന്റെ നേതൃത്വത്തിലുള്ള മൂന്നംഗ ഉന്നതതല പ്രതിനിധി സംഘം മേയ് 24 ഞായറാഴ്ച കുവൈറ്റിലെത്തും. യുഎസ്-ഇസ്രായേൽ-ഇറാൻ സംഘർഷത്തെ തുടർന്ന് ഹോർമുസ് കടലിടുക്കിലുണ്ടായ തടസ്സങ്ങൾ കുവൈറ്റിലെ വിപണിയെ ബാധിക്കാതിരിക്കാൻ അന്താരാഷ്ട്ര തലത്തിൽ ലഭിക്കുന്ന ഇത്തരം പിന്തുണകൾ ഏറെ നിർണായകമാണ്.
