കുവൈത്ത് പെട്രോളിയം കോർപ്പറേഷൻ (KPC) രാജ്യത്ത് അന്താരാഷ്ട്ര Q8 ബ്രാൻഡിന്റെ ആദ്യ ഇന്ധന സ്റ്റേഷൻ ഔദ്യോഗികമായി പ്രവർത്തനം ആരംഭിച്ചു. അഹ്മദി ഗവർണറേറ്റിലെ അൽ-റിഖാ പ്രദേശത്തുള്ള പുതിയ സ്റ്റേഷൻ പ്രധാനമന്ത്രി ശൈഖ് അഹ്മദ് അബ്ദുല്ല അൽ-അഹ്മദ് അൽ-സബാഹ് ഉദ്ഘാടനം ചെയ്തു.
അഞ്ച് പുതിയ Q8 സ്റ്റേഷനുകൾ ആരംഭിക്കുന്ന പദ്ധതിയുടെ ഭാഗമായാണ് ഈ ആദ്യ സ്റ്റേഷൻ തുറന്നത്. ചടങ്ങിൽ സംസാരിച്ച പ്രധാനമന്ത്രി, രാജ്യത്തിന്റെ എണ്ണമേഖലയെ ശക്തിപ്പെടുത്തുന്നതിനും സാമ്പത്തിക വളർച്ച കൈവരിക്കുന്നതിനുമുള്ള സർക്കാരിന്റെ പ്രതിബദ്ധത ആവർത്തിച്ചു.Q8 ബ്രാൻഡിന്റെ വരവിലൂടെ ഉപഭോക്താക്കൾക്ക് കൂടുതൽ നിലവാരമുള്ള സേവനങ്ങളും ആധുനിക സൗകര്യങ്ങളും ലഭ്യമാകുമെന്ന് അദ്ദേഹം പറഞ്ഞു. ലോജിസ്റ്റിക്സ് സംവിധാനങ്ങൾ മെച്ചപ്പെടുത്താനും നിക്ഷേപങ്ങൾ ആകർഷിക്കാനും പുതിയ സംരംഭം സഹായിക്കുമെന്നും അദ്ദേഹം കൂട്ടിച്ചേർത്തു.
എണ്ണമന്ത്രി താരിഖ് അൽ-റൂമി Q8 ബ്രാൻഡിന്റെ ആഭ്യന്തര പ്രവേശനം കുവൈത്തിലെ എണ്ണവ്യാപാര രംഗത്തെ സുപ്രധാന നാഴികക്കല്ലാണെന്ന് വിശേഷിപ്പിച്ചു. രാജ്യത്തെ റീട്ടെയിൽ ഇന്ധന സേവനങ്ങളുടെ നിലവാരം ഉയർത്തുന്നതിനും KPCയുടെ വിവിധ അനുബന്ധ സ്ഥാപനങ്ങളെ കൂടുതൽ ഏകോപിപ്പിക്കുന്നതിനും ഇത് സഹായിക്കുമെന്ന് അദ്ദേഹം വ്യക്തമാക്കി.KPC വൈസ് ചെയർമാനും സിഇഒയുമായ ശൈഖ് നവാഫ് സൗദ് അൽ-സബാഹ് Q8 ബ്രാൻഡ് കുവൈറ്റിൽ അവതരിപ്പിച്ചതിലൂടെ കമ്പനിയുടെ ആഗോള മത്സരശേഷി വർധിക്കുമെന്നും യൂറോപ്പിലെയും ഏഷ്യയിലെയും Q8 ശൃംഖലകൾക്കൊപ്പമുള്ള നിലവാരത്തിലുള്ള സേവനം രാജ്യത്ത് ലഭ്യമാക്കാനാകുമെന്നും പറഞ്ഞു.
1961 മുതൽ രാജ്യത്തെ ഇന്ധന വിതരണ ശൃംഖല വിജയകരമായി കൈകാര്യം ചെയ്തുവരുന്ന KNPCയുടെ പാരമ്പര്യത്തെ അദ്ദേഹം അഭിനന്ദിച്ചു. പുതിയ അൽ-റിഖാ സ്റ്റേഷൻ ഇന്ധന സേവനത്തിനൊപ്പം ഷോപ്പിംഗ്, റീട്ടെയിൽ, മറ്റ് ഉപഭോക്തൃ സൗകര്യങ്ങളും ഒരുമിച്ച് നൽകുന്ന സമഗ്ര സേവന കേന്ദ്രമായിരിക്കുമെന്ന് അദ്ദേഹം വ്യക്തമാക്കി.ഉദ്ഘാടന ചടങ്ങിൽ സംസ്ഥാനത്തെ മുതിർന്ന മന്ത്രിമാർ, KPC, KNPC, KPI എന്നിവയുടെ ഉന്നത ഉദ്യോഗസ്ഥർ ഉൾപ്പെടെ നിരവധി പ്രമുഖർ പങ്കെടുത്തു.
