കുവൈറ്റ് സിറ്റി: രാജ്യത്ത് സുരക്ഷ ശക്തമാക്കുന്നതിനും പൊതുസമാധാനം നിലനിർത്തുന്നതിനുമുള്ള തുടർച്ചയായ ശ്രമങ്ങളുടെ ഭാഗമായി കുവൈറ്റ് ആഭ്യന്തര മന്ത്രാലയവും അൽ-അഹമ്മദി മുൻസിപ്പാലിറ്റിയും സംയുക്തമായി മിന അബ്ദുള്ള മേഖലയിൽ വിപുലമായ ഫീൽഡ് ഇൻസ്പെക്ഷൻ കാമ്പയിൻ നടത്തി.
ആഭ്യന്തര മന്ത്രാലയത്തിന്റെ സെക്യൂരിറ്റി ഡയറക്ടറേറ്റ്സ് ഓപ്പറേഷൻസ് ഡിപ്പാർട്ട്മെന്റിന്റെ നേതൃത്വത്തിലായിരുന്നു ഈ മിന്നൽ പരിശോധന.ഈ സംയുക്ത സുരക്ഷാ കാമ്പയിനിടെ, രാജ്യത്തെ നിലവിലുള്ള വിവിധ നിയമങ്ങളും ചട്ടങ്ങളും ലംഘിച്ച് താമസിച്ചിരുന്ന നിരവധി വ്യക്തികളെ സുരക്ഷാ ഉദ്യോഗസ്ഥർ കണ്ടെത്തി അറസ്റ്റ് ചെയ്തു.
കൂടാതെ, ഈ മേഖലയിൽ പ്രവർത്തിക്കുന്ന നിരവധി ഫുഡ് ട്രക്കുകൾ ആവശ്യമായ ഔദ്യോഗിക ലൈസൻസുകളോ കൃത്യമായ പ്രവർത്തന മാനദണ്ഡങ്ങളോ പാലിക്കാതെയാണ് പ്രവർത്തിക്കുന്നതെന്നും പരിശോധനാ സംഘം കണ്ടെത്തി. നിയമലംഘനം നടത്തിയ ഈ കച്ചവടക്കാർക്കെതിരെയും മറ്റ് വ്യക്തികൾക്കെതിരെയും ഉടനടി നിയമനടപടികൾ സ്വീകരിക്കുകയും തുടർനടപടികൾക്കായി ഇവരെ ബന്ധപ്പെട്ട ഉയർന്ന സുരക്ഷാ അധികാരികൾക്ക് കൈമാറുകയും ചെയ്തു.
