കുവൈത്ത്: നുവൈസീബ് അതിർത്തി ചെക്ക്‌പോസ്റ്റിലൂടെ അനധികൃതമായി സിഗരറ്റുകൾ കടത്താനുള്ള ശ്രമം കുവൈത്ത് കസ്റ്റംസ് അധികൃതർ പരാജയപ്പെടുത്തി. പരിശോധനയ്ക്കിടെ 63 കാർട്ടൺ സിഗരറ്റുകളാണ് പിടിച്ചെടുത്തത്.
അതിർത്തി വഴി കടന്നുപോകാൻ ശ്രമിച്ച വാഹനത്തിൽ നടത്തിയ പരിശോധനയിലാണ് സിഗരറ്റുകൾ കണ്ടെത്തിയത്.കസ്റ്റംസ് നിയമങ്ങളും നടപടിക്രമങ്ങളും ലംഘിച്ച് സിഗരറ്റുകൾ കടത്താനുള്ള ശ്രമമാണ് അധികൃതരുടെ ജാഗ്രതയിലൂടെ തടഞ്ഞത്.കസ്റ്റംസ് ജനറൽ അഡ്മിനിസ്ട്രേഷൻ പുറത്തുവിട്ട വിവരങ്ങൾ പ്രകാരം, ഗൾഫ് രാജ്യങ്ങളിൽ നിന്നുള്ള ഒരു യാത്രക്കാരന്റെ വാഹനത്തിനുള്ളിലെ ബാഗിൽ ഒളിപ്പിച്ച നിലയിലായിരുന്നു സിഗരറ്റ് കാർട്ടണുകൾ സൂക്ഷിച്ചിരുന്നത്.
വാഹന പരിശോധനയ്ക്കിടെ കസ്റ്റംസ് ഉദ്യോഗസ്ഥർ നടത്തിയ സൂക്ഷ്മമായ പരിശോധനയിലാണ് കടത്ത് ശ്രമം കണ്ടെത്തിയത്.അതിർത്തി ചെക്ക്‌പോസ്റ്റുകളിൽ പരിശോധന കൂടുതൽ ശക്തമാക്കുമെന്നും വിവിധ രീതികളിലുള്ള കള്ളക്കടത്ത് ശ്രമങ്ങൾ തടയുന്നതിനുള്ള നടപടികൾ തുടരുമെന്നും കസ്റ്റംസ് അധികൃതർ വ്യക്തമാക്കി.രാജ്യത്തിന്റെ സുരക്ഷയും സാമ്പത്തിക താൽപ്പര്യങ്ങളും സംരക്ഷിക്കുന്നതിൽ കസ്റ്റംസ് ഉദ്യോഗസ്ഥരുടെ ജാഗ്രത നിർണായകമാണെന്നും അധികൃതർ അറിയിച്ചു.
