കുവൈറ്റ് സിറ്റി: പരിസ്ഥിതി സൗഹൃദപരമായ സമീപനത്തിനും ഊർജ്ജ കാര്യക്ഷമതയ്ക്കും നൽകിയ സംഭാവനകളെ മാനിച്ച്, അൽ-സദു ഹാന്റിക്രാഫ്റ്റ് സൊസൈറ്റിയുടെ നേതൃത്വത്തിൽ പ്രവർത്തിക്കുന്ന ‘സൂഫ്’ നൂൽനൂൽപ്പ് കേന്ദ്രത്തിന് അന്താരാഷ്ട്ര അംഗീകാരം. അമേരിക്കൻ അസോസിയേഷൻ ഓഫ് എനർജി എഞ്ചിനീയേഴ്സ് നൽകുന്ന മിഡിൽ ഈസ്റ്റ് ആൻഡ് നോർത്ത് ആഫ്രിക്ക മേഖലയിലെ “ഇന്നൊവേറ്റീവ് എനർജി പ്രൊജക്റ്റ് ഓഫ് ദി ഇയർ 2026” പുരസ്കാരമാണ് ഈ പദ്ധതി കരസ്ഥമാക്കിയത്.
അൽ-സദു സൊസൈറ്റി, കുവൈറ്റ് ഫൗണ്ടേഷൻ ഫോർ ദി അഡ്വാൻസ്മെന്റ് ഓഫ് സയൻസസ്, ലൈവ്സ്റ്റോക്ക് ട്രാൻസ്പോർട്ട് ആൻഡ് ട്രേഡിംഗ് കമ്പനി (മവാഷി) എന്നിവയുടെ തന്ത്രപരമായ പങ്കാളിത്തത്തിലൂടെയാണ് ഈ കേന്ദ്രം വികസിപ്പിച്ചെടുത്തത്. കുവൈറ്റിലെ തദ്ദേശീയമായ ആട്ടുരോമം സുസ്ഥിരമായ രീതിയിൽ സംസ്കരിക്കുന്ന ആദ്യത്തെ പരിസ്ഥിതി സൗഹൃദ ഫാക്ടറിയാണ് ‘സൂഫ്’ എന്ന് കുവൈറ്റ് ഫൗണ്ടേഷൻ ഫോർ ദി അഡ്വാൻസ്മെന്റ് ഓഫ് സയൻസസ് വ്യക്തമാക്കി.തദ്ദേശീയ പ്രകൃതിവിഭവങ്ങളെ പരമാവധി പ്രയോജനപ്പെടുത്തുക, കമ്പിളി വ്യവസായത്തെ അന്താരാഷ്ട്ര നിലവാരത്തിലേക്ക് ഉയർത്തുക, സർക്കുലർ എക്കോണമി പ്രോത്സാഹിപ്പിക്കുക എന്നീ ലക്ഷ്യങ്ങളോടെയാണ് ഈ ദേശീയ പദ്ധതി പ്രവർത്തിക്കുന്നത്. ഊർജ്ജ സംരക്ഷണ രംഗത്തെ മികച്ച പ്രവർത്തനങ്ങൾക്കുള്ള വലിയ അംഗീകാരമായാണ് ഈ അന്താരാഷ്ട്ര പുരസ്കാരം വിലയിരുത്തപ്പെടുന്നത്.
