കുവൈറ്റ് സിറ്റി: പൊതുജനങ്ങൾക്ക് ട്രാഫിക് സംബന്ധമായ സേവനങ്ങൾ കൂടുതൽ എളുപ്പത്തിലും വേഗത്തിലും ലഭ്യമാക്കുന്നതിന്റെ ഭാഗമായി, രാജ്യത്തെ എല്ലാ ഗവർണറേറ്റുകളിലുമുള്ള ട്രാഫിക് വകുപ്പുകളുടെ ഔദ്യോഗിക പ്രവൃത്തി സമയം ജനറൽ ഡയറക്ടറേറ്റ് ഓഫ് ട്രാഫിക് പ്രഖ്യാപിച്ചു. വാഹന പരിശോധന, ഡ്രൈവിംഗ് ടെസ്റ്റ്, ഡ്രൈവിംഗ് ലൈസൻസ്, വാഹന രജിസ്ട്രേഷൻ, ട്രാഫിക് ലംഘനങ്ങളുമായി ബന്ധപ്പെട്ട സേവനങ്ങൾ എന്നിവയെല്ലാം ഈ വകുപ്പുകളിൽ ഉൾപ്പെടുന്നു. ഓരോ വകുപ്പിന്റെയും പ്രവർത്തന സ്വഭാവം അനുസരിച്ച് രാവിലത്തെയും വൈകുന്നേരത്തെയും ഷിഫ്റ്റുകൾ പ്രത്യേകം ക്രമീകരിച്ചിട്ടുണ്ട്.
പുതിയ സമയക്രമം താഴെ പറയുന്ന രീതിയിലാണ്:ടെക്നിക്കൽ ഇൻസ്പെക്ഷൻ, ഡ്രൈവിംഗ് ടെസ്റ്റ് വിഭാഗങ്ങൾ: രാവിലത്തെ ഷിഫ്റ്റ്: 7:30 AM മുതൽ 1:30 PM വരെ.വൈകുന്നേരത്തെ ഷിഫ്റ്റ്: 1:30 PM മുതൽ 6:00 PM വരെ.ഡ്രൈവിംഗ് ലൈസൻസ്, വാഹന ലൈസൻസിങ് , ട്രാഫിക് നിയമ ലംഘന വിഭാഗങ്ങൾ:രാവിലത്തെ ഷിഫ്റ്റ്: 7:30 AM മുതൽ 1:30 PM വരെ.വൈകുന്നേരത്തെ ഷിഫ്റ്റ്: 5:00 PM മുതൽ 9:30 PM വരെ.
ഈ സമയക്രമം രാജ്യത്തെ എല്ലാ ഗവർണറേറ്റുകൾക്കും ഒരുപോലെ ബാധകമാണെന്ന് ട്രാഫിക് ഡയറക്ടറേറ്റ് സ്ഥിരീകരിച്ചു. വൈകുന്നേരത്തെ പ്രവൃത്തി സമയങ്ങളിൽ വിവിധ വകുപ്പുകൾ തമ്മിൽ വ്യത്യാസമുള്ളതിനാൽ, സന്ദർശകർ തങ്ങളുടെ ഇടപാടുകൾ സുഗമമായി പൂർത്തിയാക്കുന്നതിനായി നിശ്ചിത സമയം അവസാനിക്കുന്നതിന് മുൻപായി തന്നെ ഓഫീസുകളിൽ എത്തിച്ചേരണമെന്ന് അധികൃതർ അഭ്യർത്ഥിച്ചു.
