കുവൈറ്റ് സിറ്റി: ജ്യോതിശാസ്ത്ര കണക്കുകൂട്ടലുകൾ പ്രകാരം കുവൈറ്റ് കടുത്ത വേനൽക്കാലത്തിന്റെ പ്രവേശന വിളംബരമായ ‘പ്ലീയാഡിസ്’ സീസണിലേക്ക് കടക്കാൻ ഒരുങ്ങുന്നതായി അൽ ഉജൈരി സയന്റിഫിക് സെന്റർ അറിയിച്ചു. 2026 ജൂൺ 7 മുതലാണ് 13 ദിവസങ്ങൾ നീണ്ടുനിൽക്കുന്ന ഈ ജ്യോതിശാസ്ത്ര പ്രതിഭാസം ആരംഭിക്കുന്നത്. ആകാശത്ത് പ്ലീയാഡിസ് നക്ഷത്രക്കൂട്ടം പ്രത്യക്ഷപ്പെടുന്നതിനോട് അനുബന്ധിച്ചാണ് ഈ കാലയളവ് കണക്കാക്കുന്നത്.
ഈ സീസണിന്റെ തുടക്കത്തോടെ രാജ്യത്ത് താപനിലയിൽ ഗണ്യമായ വർദ്ധനവ് രേഖപ്പെടുത്തുമെന്ന് സെന്റർ വ്യക്തമാക്കി. ഇതിനൊപ്പം ‘അൽ ബവാരിഹ്’ എന്നറിയപ്പെടുന്ന ശക്തമായ വരണ്ട കാറ്റ് സജീവമാകാൻ സാധ്യതയുണ്ട്. ഇത് പലപ്പോഴും അന്തരീക്ഷത്തിൽ കടുത്ത പൊടിപടലങ്ങൾ നിറയുന്നതിന് (പൊടിക്കാറ്റ്) കാരണമായേക്കാം. ജൂൺ 7-ന് കിഴക്ക് ദിശയിൽ നിന്ന് ഉദിച്ചുയരുന്ന പ്ലീയാഡിസ് നക്ഷത്രം ജൂൺ 19 വരെ ആകാശത്ത് അതിന്റെ സഞ്ചാരം തുടരും. ഈ കാലയളവിൽ രാത്രി സമയങ്ങളിൽ കൂടുതൽ സമയം ഈ നക്ഷത്രക്കൂട്ടത്തെ വ്യക്തമായി കാണാൻ സാധിക്കും.
യഥാർത്ഥ വേനൽക്കാലത്തിന്റെ ആദ്യ ഘട്ടമായാണ് ‘അൽ തുറയ’ സീസൺ കണക്കാക്കപ്പെടുന്നത്. ഇതോടൊപ്പം കൂടുതൽ ചൂടുള്ളതും വരണ്ടതുമായ അന്തരീക്ഷം സമ്മാനിക്കുന്ന ‘അൽ മർബനിയത്ത് അൽ ഖൈദ്’ (Al Marbaniyat Al Qaydh) എന്ന പ്രതിഭാസവും ആരംഭിക്കും. ഈ സമയത്ത് ശക്തമായ പൊടിക്കാറ്റുകൾ അടിച്ചുവീശാനും സസ്യലതാദികൾ വലിഞ്ഞുണങ്ങാനും സാധ്യതയുണ്ടെന്ന് അൽ ഉജൈരി സയന്റിഫിക് സെന്റർ പ്രസ്താവനയിലൂടെ പൊതുജനങ്ങൾക്ക് മുന്നറിയിപ്പ് നൽകി.
