കുവൈത്ത് സിറ്റി: അൽ-റിഹാബ് പ്രദേശത്ത് ആഡംബര കാറുമായി ഉണ്ടായ അപകടത്തിൽ ഗുരുതരമായി പരിക്കേറ്റ പ്രവാസി ആശുപത്രിയിൽ ഐസിയുവിൽ പ്രവേശിപ്പിച്ചു. സംഭവത്തിൽ ആഭ്യന്തര മന്ത്രാലയം സമഗ്ര അന്വേഷണം ആരംഭിച്ചു. സുരക്ഷാ ഉറവിടങ്ങൾ പ്രകാരം, ഒരു വാഹനാപകടത്തെക്കുറിച്ചുള്ള അടിയന്തര വിവരം ലഭിച്ചതിനെ തുടർന്ന് ഫർവാനിയയിലെ സുരക്ഷാ സംഘങ്ങൾ സ്ഥലത്തെത്തി. അപകടത്തിന്റെ സാഹചര്യങ്ങളെക്കുറിച്ച് വ്യക്തതയില്ലാത്ത നിലയാണ് നിലവിൽ.ലക്സറി കാർ ഓടിച്ചിരുന്ന കുവൈത്തി പൗരൻ, 1974ൽ ജനിച്ച പ്രവാസി അപ്രതീക്ഷിതമായി റോഡിലേക്ക് ചാടി തന്റെ വാഹനത്തിന് മുന്നിൽ വന്നുവെന്നാണ് അന്വേഷണ ഉദ്യോഗസ്ഥരോട് പറഞ്ഞത്.
എന്നാൽ ഈ അവകാശവാദം ഇതുവരെ സ്ഥിരീകരിച്ചിട്ടില്ലെന്ന് അധികൃതർ അറിയിച്ചു.പരിക്കേറ്റ വ്യക്തിയെ ഉടൻ ഫർവാനിയ ആശുപത്രിയിൽ പ്രവേശിപ്പിച്ചു, ഗുരുതരാവസ്ഥ കാരണം ഐസിയുവിൽ ചികിത്സയിലാണ്. അതേസമയം, ‘ഹിറ്റ് ആൻഡ് റൺ’ കേസിന്റെ ഭാഗമായി ഡ്രൈവറെ കസ്റ്റഡിയിലെടുത്തിട്ടുണ്ട്. സംഭവത്തിന്റെ യഥാർത്ഥ കാരണം കണ്ടെത്തുന്നതിനായി സിസിടിവി ദൃശ്യങ്ങൾ ഉൾപ്പെടെ തെളിവുകൾ പരിശോധിക്കുമെന്ന് അധികൃതർ അറിയിച്ചു. ഇത് അപകടമാണോ, ഉദ്ദേശപൂർവമായ പ്രവർത്തിയാണോ, അല്ലെങ്കിൽ മറ്റേതെങ്കിലും കാരണമാണോ എന്ന് കണ്ടെത്താൻ അന്വേഷണം തുടരുകയാണ്.
