കുവൈറ്റ് സിറ്റി: അന്താരാഷ്ട്ര തലത്തിലെ മികച്ച പ്രവർത്തന രീതികളും ആധുനിക കസ്റ്റംസ് മാനദണ്ഡങ്ങളും നടപ്പിലാക്കാനുള്ള കുവൈറ്റിന്റെ പ്രതിബദ്ധത ജനറൽ അഡ്മിനിസ്ട്രേഷൻ ഓഫ് കസ്റ്റംസ് ആവർത്തിച്ചു വ്യക്തമാക്കി. ബെൽജിയത്തിലെ ബ്രസൽസിൽ നടന്ന വേൾഡ് കസ്റ്റംസ് ഓർഗനൈസേഷൻ കൗൺസിലിന്റെ 147, 148 സെഷനുകളിൽ രാജ്യം പങ്കെടുത്തത് കുവൈറ്റിന്റെ കസ്റ്റംസ് സംവിധാനത്തിന്റെ കാര്യക്ഷമതയും സേവന നിലവാരവും ഉയർത്താനുള്ള നിശ്ചയദാർഢ്യത്തിന്റെ പ്രതിഫലനമാണെന്ന് അധികൃതർ അറിയിച്ചു.പോർട്ട്സ്, റിസർച്ച് ആൻഡ് കസ്റ്റംസ് ഇൻവെസ്റ്റിഗേഷൻ അഫയേഴ്സ് വൈസ് പ്രസിഡന്റ് സാലിഹ് അൽ ഒമറിന്റെ നേതൃത്വത്തിലുള്ള കുവൈറ്റ് പ്രതിനിധി സംഘമാണ് ഈ ഉന്നതതല യോഗത്തിൽ പങ്കെടുത്തത്. കസ്റ്റംസ് നടപടിക്രമങ്ങൾ ആധുനികവൽക്കരിക്കുന്നതുമായി ബന്ധപ്പെട്ട നിരവധി സാങ്കേതിക വിഷയങ്ങൾ യോഗത്തിൽ ചർച്ചയായി.
പ്രധാനമായും സാധനങ്ങൾ എത്തുന്നതിന് മുൻപ് തന്നെ അനുമതി നൽകുന്ന ‘പ്രീ-ക്ലിയറൻസ്’ സംവിധാനങ്ങൾ നടപ്പിലാക്കുന്നതിനാണ് യോഗം ഊന്നൽ നൽകിയത്. ഇതോടൊപ്പം ആഗോള വ്യാപാരം സുഗമമാക്കുക, സപ്ലൈ ചെയിൻ സുരക്ഷ ശക്തമാക്കുക, കസ്റ്റംസ് പ്രവർത്തനങ്ങളിൽ ഡിജിറ്റൽ സാങ്കേതികവിദ്യകളും നൂതന പരിഹാരങ്ങളും പ്രോത്സാഹിപ്പിക്കുക തുടങ്ങിയ ലക്ഷ്യങ്ങളോടെയുള്ള അന്താരാഷ്ട്ര സംരംഭങ്ങളും മാനദണ്ഡങ്ങളും യോഗം അവലോകനം ചെയ്തു.ഈ ആഗോള സമ്മേളനത്തിൽ ചർച്ച ചെയ്ത പല പ്രധാന മുൻഗണനകളും കുവൈറ്റ് ഇപ്പോൾ നടപ്പിലാക്കിക്കൊണ്ടിരിക്കുന്ന കസ്റ്റംസ് പരിഷ്കരണങ്ങളുമായി പൊരുത്തപ്പെടുന്നതാണെന്ന് ഭരണകൂടം ചൂണ്ടിക്കാട്ടി.
മുൻകൂട്ടി അനുമതി നൽകുന്ന പ്രീ-ക്ലിയറൻസ് സംവിധാനം ഏർപ്പെടുത്തുക, കസ്റ്റംസ് നടപടിക്രമങ്ങൾ പൂർണ്ണമായി ഓട്ടോമേറ്റ് ചെയ്യുക, റിസ്ക് മാനേജ്മെന്റും സ്മാർട്ട് ടാർഗെറ്റിംഗ് സംവിധാനങ്ങളും ശക്തമാക്കുക, മറ്റ് സർക്കാർ ഏജൻസികളുമായുള്ള വിവരശേഖരണവും സഹകരണവും വിപുലീകരിക്കുക എന്നിവ ഇതിൽ ഉൾപ്പെടുന്നു. ഈ പുതിയ പദ്ധതികൾ കസ്റ്റംസിന്റെ പ്രവർത്തനക്ഷമത വർദ്ധിപ്പിക്കാനും നിയമപരമായ വ്യാപാരങ്ങൾ വേഗത്തിലാക്കാനും അതിർത്തി സുരക്ഷ ഉറപ്പാക്കാനും അതുവഴി രാജ്യത്തിന്റെ സമ്പദ്വ്യവസ്ഥയ്ക്കും സമൂഹത്തിനും കൂടുതൽ സംരക്ഷണം നൽകാനും സഹായിക്കുമെന്ന് അധികൃതർ പ്രത്യാശ പ്രകടിപ്പിച്ചു.
