കുവൈറ്റ് സിറ്റി: കുവൈറ്റിലെ ഇന്ത്യൻ കോൺസുലർ സേവനങ്ങളുടെ ഔട്ട്സോഴ്സിംഗ് കരാറുമായി ബന്ധപ്പെട്ട നിയമനടപടികൾ തുടരുന്നതിനാൽ സേവനങ്ങൾ താൽക്കാലികമായി ഇന്ത്യൻ എംബസി നേരിട്ട് നൽകും. പാസ്പോർട്ട്, വിസ സേവനങ്ങൾക്ക് താൽക്കാലിക നിയന്ത്രണം ഏർപ്പെടുത്തി. തിങ്കളാഴ്ച മുതൽ ജൂലൈ 9 വ്യാഴാഴ്ച വരെ അതീവ അടിയന്തിര പ്രാധാന്യമുള്ള അപേക്ഷകൾ മാത്രമേ സ്വീകരിക്കുകയുള്ളൂ എന്ന് എംബസി അധികൃതർ അറിയിച്ചു. എംബസിയുടെ ഔദ്യോഗിക എക്സ് ഹാൻഡിൽ വഴിയാണ് ഇക്കാര്യം വ്യക്തമാക്കിയത്.
ജൂലൈ 1 മുതൽ കോൺസുലർ സേവനങ്ങളുടെ ചുമതല നിലവിലെ സേവനദാതാവായ ബിഎൽഎസ് ഇന്റർനാഷണലിൽ നിന്ന് ഡീയു ഗ്ലോബൽ ഡിജിറ്റലിന് കൈമാറാനായിരുന്നു തീരുമാനം. എന്നാൽ ടെൻഡർ നടപടിക്രമത്തിനെതിരെ മത്സരത്തിൽ പരാജയപ്പെട്ട രണ്ട് കമ്പനികൾ ഡൽഹി ഹൈക്കോടതിയെ സമീപിച്ചതോടെ കരാർ നിയമപരമായ പരിശോധനയ്ക്ക് വിധേയമായി.ഹർജികളിലെ വാദം പൂർത്തിയായ സാഹചര്യത്തിൽ കോടതി വിധി പിന്നീട് പ്രഖ്യാപിക്കുമെന്ന് അറിയിച്ചിട്ടുണ്ട്. അന്തിമ വിധി പുറത്തുവരുന്നതുവരെ സേവനങ്ങളിൽ തടസ്സമുണ്ടാകാതിരിക്കാൻ ഇന്ത്യൻ എംബസി ഇടക്കാല സംവിധാനമായി നേരിട്ട് അപേക്ഷകൾ സ്വീകരിക്കുകയും കോൺസുലർ സേവനങ്ങൾ നൽകുകയും ചെയ്യുമെന്ന് അറിയിച്ചു.
അടിയന്തിരമായി പ്രോസസ്സ് ചെയ്യേണ്ടതിന്റെ ആവശ്യകത തെളിയിക്കുന്ന കൃത്യമായ രേഖകൾ സമർപ്പിക്കുന്ന അപേക്ഷകൾ മാത്രമേ ഈ കാലയളവിൽ പരിഗണിക്കുകയുള്ളൂ. തത്കാൽ പാസ്പോർട്ട് വിതരണം, എൻആർഐ സർട്ടിഫിക്കറ്റുകൾ, കാലാവധി കഴിഞ്ഞ സിവിൽ ഐഡി കാർഡുകളുമായി ബന്ധിപ്പിച്ചിട്ടുള്ള ചുരുങ്ങിയ കാലാവധിയുള്ള പാസ്പോർട്ടുകൾ, എമർജൻസി സർട്ടിഫിക്കറ്റുകൾ, ഇലക്ട്രോണിക് വിസകൾ എന്നിവ ഇതിൽ ഉൾപ്പെടുന്നു.സാധാരണ രീതിയിലുള്ള പാസ്പോർട്ട് അപേക്ഷകൾ, അറ്റസ്റ്റേഷൻ സേവനങ്ങൾ, സ്റ്റാൻഡേർഡ് വിസകൾ എന്നിവ ഈ ദിവസങ്ങളിൽ സ്വീകരിക്കുകയോ നടപടികൾ സ്വീകരിക്കുകയോ ഇല്ലെന്ന് എംബസി വ്യക്തമാക്കി. കൂടാതെ, കുവൈറ്റിലെ എല്ലാ ഇന്ത്യൻ കോൺസുലർ ആപ്ലിക്കേഷൻ സെന്ററുകളുടെയും പ്രവർത്തനം അടുത്ത അറിയിപ്പ് ഉണ്ടാകുന്നത് വരെ താൽക്കാലികമായി നിർത്തിവെച്ചതായും എംബസി സ്ഥിരീകരിച്ചിട്ടുണ്ട്.
അടിയന്തിര ആവശ്യങ്ങളുള്ള അപേക്ഷകർ രാവിലെ 9:00 മണി മുതൽ ഉച്ചയ്ക്ക് 12:00 മണി വരെയുള്ള സമയത്തിനുള്ളിൽ മാത്രമേ എംബസിയുടെ കോൺസുലർ വിഭാഗം സന്ദർശിക്കാവൂ. ആവശ്യമായ അനുബന്ധ രേഖകൾ സമർപ്പിച്ചാൽ മാത്രമേ അടിയന്തിര കേസുകളായി പരിഗണിക്കുകയുള്ളൂ എന്ന് അധികൃതർ ഊന്നിപ്പറഞ്ഞു. ഇത് സംബന്ധിച്ച കൂടുതൽ വിവരങ്ങൾ യഥാസമയം അറിയിക്കുമെന്നും, അപ്ഡേറ്റുകൾക്കായി എംബസിയുടെ ഔദ്യോഗിക വെബ്സൈറ്റും സോഷ്യൽ മീഡിയ അക്കൗണ്ടുകളും പിന്തുടരണമെന്നും പ്രവാസികളോട് അഭ്യർത്ഥിച്ചു.
