കുവൈറ്റ് സിറ്റി: കുവൈറ്റിലെ പ്രമുഖ വാണിജ്യ-താമസ കേന്ദ്രമായ സാൽമിയയിലെ ‘അമ്മാൻ സ്ട്രീറ്റിന്റെ’ ഒരു ഭാഗം താൽായികമായി അടച്ചിടുന്നതായി ജനറൽ ട്രാഫിക് ഡിപ്പാർട്ട്മെന്റ് അറിയിച്ചു. ജൂലൈ 10 വെള്ളിയാഴ്ച പുലർച്ചെ മുതൽ ജൂലൈ 12 ഞായറാഴ്ച വരെയാണ് ഈ ഗതാഗത നിയന്ത്രണം ഏർപ്പെടുത്തിയിരിക്കുന്നത്. ഫിഫ്ത് റിംഗ് റോഡിൽ നിന്നുള്ള പ്രവേശന കവാടം മുതൽ സാൽമിയയിലെ റൗണ്ട് എബൗട്ട് വരെയുള്ള അമ്മാൻ സ്ട്രീറ്റിന്റെ ഭാഗമാണ് ഇത്തരത്തിൽ പൂർണ്ണമായി അടച്ചിടുക.
ഈ ദിവസങ്ങളിൽ സാൽമിയ ഭാഗത്തേക്ക് പോകുന്നവരും ഈ റൂട്ടിൽ സ്ഥിരമായി യാത്ര ചെയ്യുന്നവരും ബദൽ റോഡുകൾ ഉപയോഗിക്കണമെന്ന് ട്രാഫിക് അധികൃതർ നിർദ്ദേശിച്ചു. യാത്രക്കാർ റോഡിലെ താൽക്കാലിക ഡൈവേർഷൻ സൈൻ ബോർഡുകൾ ശ്രദ്ധിക്കണമെന്നും, വാഹനങ്ങളുടെ സുഗമമായ യാത്ര ഉറപ്പാക്കാൻ ട്രാഫിക് പോലീസിന്റെ നിർദ്ദേശങ്ങൾ കർശനമായി പാലിക്കണമെന്നും ജനറൽ ട്രാഫിക് ഡിപ്പാർട്ട്മെന്റ് അഭ്യർത്ഥിച്ചു.
