കുവൈത്ത് സിറ്റി, ജൂലൈ 20: ഭരണപരമായ കാരണങ്ങളാൽ കുവൈത്തിലെ ഇന്ത്യൻ എംബസിയിലെ കോൺസുലർ, പാസ്പോർട്ട്, വിസ സേവനങ്ങൾ 2026 ജൂലൈ 26 (ഞായർ) വരെ അടിയന്തര ആവശ്യങ്ങൾക്ക് മാത്രമായി പരിമിതപ്പെടുത്തുന്നതായി എംബസി അറിയിച്ചു.എംബസി പുറത്തിറക്കിയ അടിയന്തര അറിയിപ്പിൽ, അടിയന്തര സേവനം ആവശ്യപ്പെടുന്നവർ അപേക്ഷയുടെ അടിയന്തര സ്വഭാവം തെളിയിക്കുന്ന രേഖകൾ ഹാജരാക്കണമെന്നും വ്യക്തമാക്കി.
ഈ കാലയളവിൽ എംബസിയുടെ കോൺസുലർ വിഭാഗം അത്യാവശ്യ സേവനങ്ങൾ മാത്രമേ കൈകാര്യം ചെയ്യുകയുള്ളൂ.ലഭ്യമാകുന്ന അടിയന്തര സേവനങ്ങളിൽ തത്കാൽ പാസ്പോർട്ട്, എൻആർഐ സർട്ടിഫിക്കറ്റ്, കാലാവധി അവസാനിക്കാനിരിക്കുന്ന സിവിൽ ഐഡി ഉള്ള അപേക്ഷകർക്ക് ഹ്രസ്വകാല സാധുതയുള്ള പാസ്പോർട്ട്, എമർജൻസി സർട്ടിഫിക്കറ്റ്, ഇ-വിസ എന്നിവ ഉൾപ്പെടുന്നു.അതേസമയം, സാധാരണ പാസ്പോർട്ട് അപേക്ഷകൾ, വിസ അപേക്ഷകൾ, രേഖകളുടെ അറ്റസ്റ്റേഷൻ സേവനങ്ങൾ എന്നിവ ജൂലൈ 26 വരെ സ്വീകരിക്കുകയോ പരിഗണിക്കുകയോ ചെയ്യില്ല എന്ന് എംബസി അറിയിച്ചു.കൂടാതെ, കുവൈത്തിലെ എല്ലാ ഇന്ത്യൻ കോൺസുലർ ആപ്ലിക്കേഷൻ സെന്ററുകളും (ICAC) പുതിയ അപേക്ഷകൾ സ്വീകരിക്കുന്നതിനായി അടുത്ത അറിയിപ്പ് ഉണ്ടാകുന്നതുവരെ അടച്ചിടുമെന്നും അറിയിച്ചു.
അടിയന്തര സേവനം ആവശ്യമുള്ളവർ രാവിലെ 9.00 മുതൽ ഉച്ചയ്ക്ക് 12.00 വരെ എംബസിയുടെ കോൺസുലർ വിഭാഗത്തിൽ നേരിട്ട് എത്തി ആവശ്യമായ തെളിവ് രേഖകളോടെ അപേക്ഷ സമർപ്പിക്കണമെന്ന് എംബസി നിർദേശിച്ചു.സാധാരണ സേവനങ്ങൾ പുനഃസ്ഥാപിക്കുന്നതുമായി ബന്ധപ്പെട്ട കൂടുതൽ വിവരങ്ങൾ പിന്നീട് അറിയിക്കുമെന്നും, ഔദ്യോഗിക അറിയിപ്പുകൾക്കായി ഇന്ത്യൻ സമൂഹം എംബസിയുടെ ഔദ്യോഗിക വെബ്സൈറ്റും സോഷ്യൽ മീഡിയ പ്ലാറ്റ്ഫോമുകളും മാത്രം പിന്തുടരണമെന്നും എംബസി അഭ്യർഥിച്ചു.
