കുവൈത്ത്: രാജ്യത്തിന്റെ വിവിധ ഭാഗങ്ങളിൽ ഇടിമിന്നലോടുകൂടിയ മഴയ്ക്കും ശക്തമായ കാറ്റിനും സാധ്യതയുള്ളതിനാൽ കുവൈത്ത് കാലാവസ്ഥാ നിരീക്ഷണ വകുപ്പ് മുന്നറിയിപ്പ് പുറപ്പെടുവിച്ചു.വ്യാഴാഴ്ച പുലർച്ചെയാണ് കാലാവസ്ഥാ വകുപ്പ് പ്രത്യേക മുന്നറിയിപ്പ് നൽകിയത്. രാജ്യത്തിന്റെ വിവിധ പ്രദേശങ്ങളിൽ ഇടവിട്ടുള്ള മഴ ലഭിക്കുമെന്നും ചില സമയങ്ങളിൽ മഴയോടൊപ്പം ഇടിമിന്നലും ശക്തമായ കാറ്റും അനുഭവപ്പെടാമെന്നും അധികൃതർ അറിയിച്ചു.ചില പ്രദേശങ്ങളിൽ കാറ്റിന്റെ വേഗത മണിക്കൂറിൽ 50 കിലോമീറ്റർ കവിയാൻ സാധ്യതയുണ്ടെന്നും കാലാവസ്ഥാ വകുപ്പ് മുന്നറിയിപ്പ് നൽകി.ഒക്ടോബർ 29 വ്യാഴാഴ്ച പുലർച്ചെ 3.45 മുതൽ രാവിലെ 7.45 വരെയുള്ള നാല് മണിക്കൂറിലേക്കാണ് പ്രത്യേക കാലാവസ്ഥാ മുന്നറിയിപ്പ് പുറപ്പെടുവിച്ചത്.അസ്ഥിരമായ കാലാവസ്ഥ നിലനിൽക്കുന്ന സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു.
പ്രത്യേകിച്ച് ശക്തമായ കാറ്റും ഇടിമിന്നലും അനുഭവപ്പെടുന്ന പ്രദേശങ്ങളിൽ താമസിക്കുന്നവരും വാഹനമോടിക്കുന്നവരും കൂടുതൽ ശ്രദ്ധിക്കണം. മഴയെത്തുടർന്ന് റോഡുകളിൽ വെള്ളം കെട്ടിനിൽക്കാനും ചില സ്ഥലങ്ങളിൽ ദൂരക്കാഴ്ച കുറയാനും സാധ്യതയുള്ളതിനാൽ വാഹനയാത്രക്കാർ വേഗത നിയന്ത്രിക്കണം.വരും ദിവസങ്ങളിലും മഴയ്ക്ക് സാധ്യതകാലാവസ്ഥാ വകുപ്പിന്റെ പ്രവചനമനുസരിച്ച് വ്യാഴാഴ്ച പകൽ രാജ്യത്ത് ഭാഗികമായി മേഘാവൃതമായ കാലാവസ്ഥയായിരിക്കും. ചില പ്രദേശങ്ങളിൽ നേരിയ മഴയ്ക്ക് സാധ്യതയുണ്ട്.വെള്ളിയാഴ്ചയും ഒറ്റപ്പെട്ട മഴ ലഭിച്ചേക്കാം. ശനി, ഞായർ ദിവസങ്ങളിൽ ചില സമയങ്ങളിൽ ഇടിമിന്നലോടുകൂടിയ മഴയ്ക്കും സാധ്യതയുണ്ടെന്നാണ് പ്രവചനം.
വ്യാഴാഴ്ച രാജ്യത്തെ കൂടിയ താപനില ഏകദേശം 35 ഡിഗ്രി സെൽഷ്യസും കുറഞ്ഞ താപനില 22 ഡിഗ്രി സെൽഷ്യസുമായിരിക്കുമെന്ന് കാലാവസ്ഥാ വകുപ്പ് അറിയിച്ചു.തീരപ്രദേശങ്ങളിൽ ഈർപ്പം ഉയരാനും രാത്രിയിൽ ചില പ്രദേശങ്ങളിൽ മൂടൽമഞ്ഞ് രൂപപ്പെടാനും സാധ്യതയുണ്ട്.കാലാവസ്ഥയിൽ പെട്ടെന്നുണ്ടാകുന്ന മാറ്റങ്ങൾ കണക്കിലെടുത്ത് പൊതുജനങ്ങൾ ഔദ്യോഗിക കാലാവസ്ഥാ അറിയിപ്പുകൾ ശ്രദ്ധിക്കണമെന്നും സുരക്ഷാ മുൻകരുതലുകൾ സ്വീകരിക്കണമെന്നും നിർദേശിച്ചു.
