കുവൈത്ത് സിറ്റി: മാനുഷിക സേവനങ്ങളിലും സാമൂഹിക വികസന പ്രവർത്തനങ്ങളിലും നൽകിയ മികച്ച സംഭാവനകൾ പരിഗണിച്ച് കുവൈത്തിലെ ഷെയ്ഖ ഇൻതിസാർ സാലിം അൽ അലി അൽ സബാഹിന് ഇറ്റലിയുടെ പരമോന്നത സിവിലിയൻ ബഹുമതിയായ ഓർഡർ ഓഫ് മെറിറ്റ് സമ്മാനിച്ചു. ‘കമാൻഡർ’ (Commendatore) പദവിയിലുള്ള ബഹുമതിയാണ് ഇറ്റാലിയൻ പ്രസിഡന്റ് സെർജിയോ മാറ്ററെല്ല നൽകിയത്.വെള്ളിയാഴ്ച നടന്ന ചടങ്ങിലാണ് ഷെയ്ഖ ഇൻതിസാറിനെ ആദരിച്ചത്. സ്ത്രീശാക്തീകരണം, മാനസികാരോഗ്യ സംരക്ഷണം, യുദ്ധവും അക്രമവും ബാധിച്ച സ്ത്രീകളുടെ പുനരധിവാസം, സമാധാനത്തിന്റെയും സഹാനുഭൂതിയുടെയും സന്ദേശം പ്രചരിപ്പിക്കൽ തുടങ്ങിയ മേഖലകളിലെ പ്രവർത്തനങ്ങൾക്കാണ് അംഗീകാരം.
കുവൈത്തിലെ ഇറ്റാലിയൻ അംബാസഡർ ലോറെൻസോ മൊറിനി, സമൂഹത്തിലെ ദുർബല വിഭാഗങ്ങളെ സഹായിക്കുന്നതിലും അറബ് സ്ത്രീകളുടെ ക്ഷേമത്തിനായി പ്രവർത്തിക്കുന്നതിലും ഷെയ്ഖ ഇൻതിസാർ നൽകിയ സംഭാവനകളെ പ്രശംസിച്ചു. അവരുടെ നേതൃത്വപാടവവും സാമൂഹിക പ്രതിബദ്ധതയും കുവൈത്തിനും അന്താരാഷ്ട്ര സമൂഹത്തിനും മാതൃകയാണെന്നും അദ്ദേഹം പറഞ്ഞു.യുദ്ധവും അക്രമവും മൂലം മാനസിക ആഘാതം നേരിട്ട അറബ് സ്ത്രീകളെ സഹായിക്കുന്നതിനായി ഷെയ്ഖ ഇൻതിസാർ സ്ഥാപിച്ച ‘ഇൻതിസാർ ഫൗണ്ടേഷൻ’ ശ്രദ്ധേയമായ പ്രവർത്തനങ്ങളാണ് നടത്തുന്നത്. നാടകത്തെ അടിസ്ഥാനമാക്കിയുള്ള മനഃശാസ്ത്ര ചികിത്സ ഉൾപ്പെടെയുള്ള പ്രത്യേക പരിപാടികളിലൂടെ സ്ത്രീകൾക്ക് ആത്മവിശ്വാസം വീണ്ടെടുക്കാനും സാധാരണ ജീവിതത്തിലേക്ക് മടങ്ങാനും ഫൗണ്ടേഷൻ സഹായം നൽകുന്നു.
2013ൽ അവർ ആരംഭിച്ച ‘അൽ നുവൈർ’ സംരംഭവും കുവൈത്തിൽ ശ്രദ്ധേയമായ സാമൂഹിക പ്രവർത്തനങ്ങൾ നടത്തിവരുന്നു. പോസിറ്റീവ് ചിന്താഗതി പ്രോത്സാഹിപ്പിക്കുക, സ്ത്രീകളുടെ നേതൃത്വശേഷി വികസിപ്പിക്കുക, യുവജനങ്ങളെ ശാക്തീകരിക്കുക, വിദ്യാഭ്യാസം, ആരോഗ്യം, പരിസ്ഥിതി സംരക്ഷണം തുടങ്ങിയ മേഖലകളിൽ സാമൂഹിക മാറ്റങ്ങൾ സൃഷ്ടിക്കുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ.ബഹുമതി ലഭിച്ചതിൽ അഭിമാനമുണ്ടെന്ന് ഷെയ്ഖ ഇൻതിസാർ പ്രതികരിച്ചു. യഥാർത്ഥ സാമൂഹിക മാറ്റം വ്യക്തികളിൽ നിന്നാണ് ആരംഭിക്കുന്നതെന്നും മാനസികാരോഗ്യവും ആത്മവിശ്വാസവും ശക്തിപ്പെടുത്തുന്നതിലൂടെ കൂടുതൽ സമാധാനപരവും സുസ്ഥിരവുമായ സമൂഹം കെട്ടിപ്പടുക്കാൻ കഴിയുമെന്നും അവർ പറഞ്ഞു.
ഈ അംഗീകാരം മാനുഷിക സേവനങ്ങൾ കൂടുതൽ ശക്തമായി തുടരാനുള്ള പ്രചോദനമാണെന്നും കുവൈത്തിൽ ആരംഭിച്ച സാമൂഹിക സംരംഭങ്ങൾക്ക് അന്താരാഷ്ട്രതലത്തിൽ ലഭിക്കുന്ന അംഗീകാരമാണിതെന്നും അവർ വ്യക്തമാക്കി.1951ൽ സ്ഥാപിതമായ ഇറ്റാലിയൻ ഓർഡർ ഓഫ് മെറിറ്റ്, സാമൂഹിക, സാംസ്കാരിക, മാനുഷിക മേഖലകളിൽ മികച്ച സംഭാവനകൾ നൽകുന്ന ഇറ്റാലിയൻ പൗരന്മാർക്കും വിദേശികൾക്കും നൽകുന്ന രാജ്യത്തെ പരമോന്നത ബഹുമതികളിലൊന്നാണ്.
