കുവൈത്ത് സിറ്റി: കുവൈത്തിൽ സ്പോൺസർമാരിൽ നിന്ന് ഒളിവിൽ പോയ കേസിൽ തിരയപ്പെട്ടിരുന്ന രണ്ട് ഏഷ്യൻ സ്വദേശിനികളെ ഫർവാനിയയിൽ വെച്ച് സുരക്ഷാ ഉദ്യോഗസ്ഥർ സാഹസികമായി പിടികൂടി. റെഗുലർ പട്രോളിംഗിനിടെ പോലീസിനെ കണ്ട് ഓടി രക്ഷപ്പെടാൻ ശ്രമിച്ച യുവതികളെ പിന്തുടർന്നാണ് സുരക്ഷാ വിഭാഗം വലയിലാക്കിയത്. ഫർവാനിയയിലെ തെരുവിലൂടെ സംശയാസ്പദമായ സാഹചര്യത്തിൽ നടന്നുപോവുകയായിരുന്ന ഇരുവരെയും കണ്ട് പട്രോളിംഗ് നടത്തുകയായിരുന്ന പോലീസ് സംഘം വാഹനം നിർത്തുകയായിരുന്നു.
തുടർന്ന് ഇവരുടെ നിയമപരമായ താമസരേഖകൾ പരിശോധിക്കുന്നതിനായി തിരിച്ചറിയൽ കാർഡ് ആവശ്യപ്പെട്ടതോടെ യുവതികൾ പെട്ടെന്ന് ഓടി രക്ഷപ്പെടാൻ ശ്രമിക്കുകയായിരുന്നു. എന്നാൽ ജാഗ്രത പാലിച്ച പോലീസ് ഉദ്യോഗസ്ഥർ ഉടനടി പിന്തുടർന്ന് ഇതിലൊരു യുവതിയെ പിടികൂടി. തുടർന്ന് നടത്തിയ ചോദ്യം ചെയ്യലിൽ ഇവർ നൽകിയ വിവരത്തിന്റെ അടിസ്ഥാനത്തിൽ സമീപപ്രദേശത്ത് ഒളിവിൽ കഴിഞ്ഞിരുന്ന രണ്ടാമത്തെ യുവതിയെയും പോലീസ് കസ്റ്റഡിയിലെടുത്തു.
തുടർന്ന് നടത്തിയ വിശദമായ രേഖാപരിശോധനയിലാണ് ഇരുവരും സ്പോൺസർമാരുടെ പക്കൽ നിന്നും ഒളിച്ചോടിയ കേസിൽ രാജ്യത്തെ വിവിധ പോലീസ് സ്റ്റേഷനുകളിൽ തിരയപ്പെടുന്നവരാണെന്ന് വ്യക്തമായത്. പിടികൂടിയ രണ്ട് ഏഷ്യൻ യുവതികൾക്കെതിരെയുമുള്ള പ്രാഥമിക നിയമനടപടികൾ പൂർത്തിയാക്കിയ ശേഷം തുടർനടപടികൾക്കായി ഇവരെ ബന്ധപ്പെട്ട ഉന്നത ഉദ്യോഗസ്ഥർക്ക് കൈമാറി. ഇത്തരം അനധികൃത താമസക്കാർക്കെതിരെയുള്ള പരിശോധനകൾ വരും ദിവസങ്ങളിലും ശക്തമായി തുടരുമെന്ന് അധികൃതർ വ്യക്തമാക്കി.
