കുവൈറ്റ് സിറ്റി: മേഖലയിലെ രാഷ്ട്രീയ അസ്ഥിരതകളും ആഗോള വിതരണ ശൃംഖലയിലെ തടസ്സങ്ങളും നിലനിൽക്കുമ്പോഴും ഭക്ഷ്യസുരക്ഷാ രംഗത്ത് മികച്ച പ്രതിരോധം തീർത്ത് കുവൈറ്റ് മാതൃകയാകുന്നു. സർക്കാരും ദേശീയ ഉൽപ്പാദന യൂണിയനുകളും സംയുക്തമായി നടത്തുന്ന പ്രവർത്തനങ്ങളിലൂടെ രാജ്യത്ത് അവശ്യസാധനങ്ങളുടെ ലഭ്യതയും വിലസ്ഥിരതയും ഉറപ്പാക്കാൻ സാധിച്ചിട്ടുണ്ട്.
വിപണിയിലെ ചാഞ്ചാട്ടങ്ങൾ സാധാരണക്കാരെ ബാധിക്കാത്ത രീതിയിൽ കൃത്യമായ ഏകോപനമാണ് സർക്കാർ ഏജൻസികൾ കാഴ്ചവെക്കുന്നത്.അടിസ്ഥാന വിഭവങ്ങൾ ആവശ്യമായ അളവിൽ വിപണിയിൽ എത്തുന്നുണ്ടെന്ന് ഉറപ്പുവരുത്തുന്നതിലൂടെ വിപണിയിലെ അനിശ്ചിതത്വം ഒഴിവാക്കാൻ അധികൃതർക്ക് കഴിഞ്ഞു. ഇറക്കുമതിയെ അമിതമായി ആശ്രയിക്കുന്നത് കുറയ്ക്കാനും ആഭ്യന്തര ഉൽപ്പാദനം വർദ്ധിപ്പിക്കാനും സാധിച്ചത് കുവൈറ്റിന്റെ ഭക്ഷ്യശൃംഖലയെ കൂടുതൽ ശക്തമാക്കിയിട്ടുണ്ട്. സ്വയംപര്യാപ്തതയിലേക്കുള്ള ഈ ചുവടുവെപ്പ് ദേശീയ സാമ്പത്തിക ഭദ്രതയ്ക്ക് കരുത്തേകുന്നതാണെന്ന് ഉന്നത ഉദ്യോഗസ്ഥർ വിലയിരുത്തി.
പ്രാദേശിക പച്ചക്കറി ഉൽപ്പാദനം വർദ്ധിപ്പിക്കുന്നതിൽ കുവൈറ്റ് ഫാർമേഴ്സ് യൂണിയൻ നിർണ്ണായക പങ്കാണ് വഹിക്കുന്നത്. ഹോർമുസ് കടലിടുക്ക് പോലുള്ള പ്രധാന ഗതാഗത പാതകളിലുണ്ടാകുന്ന തടസ്സങ്ങൾ വിതരണത്തെ ബാധിക്കാതിരിക്കാൻ ആഭ്യന്തര ഉൽപ്പാദനം സഹായിച്ചു. വിദേശ രാജ്യങ്ങളിൽ നിന്നുള്ള ഇറക്കുമതി കുറച്ചുകൊണ്ട് പ്രാദേശിക കർഷകരെ പ്രോത്സാഹിപ്പിക്കുന്ന നയമാണ് ഇപ്പോൾ വിജയകരമായി നടപ്പിലാക്കിക്കൊണ്ടിരിക്കുന്നത്. വരും കാലങ്ങളിലും ഭക്ഷ്യ സുരക്ഷാ മേഖലയിൽ കൂടുതൽ നൂതന പദ്ധതികൾ ആവിഷ്കരിക്കാനാണ് സർക്കാർ ലക്ഷ്യമിടുന്നത്.
