കുവൈറ്റ് സിറ്റി: കുവൈറ്റിൽ ഓവർഹെഡ് പവർ ട്രാൻസ്മിഷൻ ലൈനിന്റെ അറ്റകുറ്റപ്പണികൾക്കിടയിൽ പരിക്കേറ്റ് ചികിത്സയിൽ കഴിയുന്ന പാകിസ്ഥാൻ സ്വദേശിയായ സാങ്കേതിക വിദഗ്ദ്ധനെ വൈദ്യുതി, ജലം, പുനരുപയോഗ ഊർജ്ജ മന്ത്രി ഡോ. സുബൈഹ് അൽ മുഖൈസീം ആശുപത്രിയിലെത്തി സന്ദർശിച്ചു. അൽ-ജഹ്റ ആശുപത്രിയിൽ ചികിത്സയിൽ കഴിയുന്ന തൊഴിലാളിയുടെ ആരോഗ്യവിവരങ്ങൾ നേരിട്ടറിയാനാണ് മന്ത്രി എത്തിയത്.വ്യാഴാഴ്ച മന്ത്രാലയം പുറത്തിറക്കിയ വാർത്താക്കുറിപ്പിലാണ് ഇക്കാര്യം അറിയിച്ചത്. സന്ദർശന വേളയിൽ പരിക്കേറ്റയാളുടെ ആരോഗ്യനിലയെക്കുറിച്ച് ഡോക്ടർമാരോട് ചോദിച്ചറിഞ്ഞ മന്ത്രി, ചികിത്സിക്കുന്ന മെഡിക്കൽ സംഘവുമായി ആശയവിനിമയം നടത്തി. തൊഴിലാളിയുടെ ആരോഗ്യനില നിലവിൽ തൃപ്തികരമാണെന്നും ആവശ്യമായ എല്ലാ മികച്ച ചികിത്സയും പരിചരണവും ഉറപ്പാക്കിയിട്ടുണ്ടെന്നും മെഡിക്കൽ സംഘം മന്ത്രിയെ അറിയിച്ചു.
മന്ത്രാലയത്തിന് കീഴിൽ ജോലി ചെയ്യുന്ന എല്ലാ ജീവനക്കാരുടെയും സുരക്ഷയ്ക്കാണ് തങ്ങൾ ഏറ്റവും കൂടുതൽ മുൻഗണന നൽകുന്നതെന്ന് ഡോ. സുബൈഹ് അൽ മുഖൈസീം വ്യക്തമാക്കി. തൊഴിൽ മേഖലകളിൽ ഏറ്റവും ഉയർന്ന സുരക്ഷാ മാനദണ്ഡങ്ങൾ നടപ്പിലാക്കാൻ മന്ത്രാലയം പ്രതിജ്ഞാബദ്ധമാണ്. കടുത്ത വെല്ലുവിളികൾ നിറഞ്ഞ സാഹചര്യങ്ങളിലും ഇലക്ട്രിക്കൽ നെറ്റ്വർക്ക് സംവിധാനങ്ങൾ തകരാറിലാകുമ്പോൾ അത് പുനഃസ്ഥാപിക്കാൻ അടിയന്തിര വിഭാഗങ്ങളും സാങ്കേതിക-എഞ്ചിനീയറിംഗ് ജീവനക്കാരും നടത്തുന്ന കഠിനാധ്വാനത്തെയും സമർപ്പണത്തെയും മന്ത്രി പ്രത്യേകം അഭിനന്ദിച്ചു.
