കുവൈറ്റ് സിറ്റി: പ്രായമായ തന്റെ മാതാവിന്റെ പേരിൽ വാടകയ്ക്കെടുത്ത വാഹനം ഉപയോഗിച്ച് ഉപഭോക്താക്കൾക്ക് വിൽപ്പന നടത്താനായി വിവിധ തരത്തിലുള്ള മദ്യക്കുപ്പികൾ കൈവശം വെച്ചെന്ന കേസിൽ യുവാവിനെ വെറുതെവിട്ട കീഴ്ക്കോടതി വിധി കുവൈറ്റ് മിസ്ഡിമീനർ അപ്പീൽ കോടതി ശരിവെച്ചു. പ്രശസ്ത അഭിഭാഷക ഈനാം ഹൈദറിന്റെ ഓഫീസിലെ അഡ്വക്കേറ്റ് യൂസഫ് അൽ-മുഹമ്മദ് പ്രതിഭാഗത്തിനായി ഹാജരായി നടത്തിയ ശക്തമായ നിയമവാദങ്ങൾ അംഗീകരിച്ചാണ് കോടതി ഉത്തരവ്. അറസ്റ്റ്, അന്വേഷണ റിപ്പോർട്ടുകളുടെ അടിസ്ഥാനത്തിൽ വിൽപ്പനയ്ക്കായി വിവിധ ബ്രാൻഡുകളിലുള്ള 27 കുപ്പി വിദേശമദ്യം കൈവശം വെച്ചെന്ന ഗുരുതരമായ കുറ്റമാണ് പബ്ലിക് പ്രോസിക്യൂഷൻ പ്രതിക്കെതിരെ ചുമത്തിയിരുന്നത്.
എന്നാൽ, പ്രതി മദ്യവിൽപ്പനയോ വിതരണമോ നടത്തിയതിനോ ഉപഭോക്താക്കളുമായി ഇടപാടുകൾ നടത്തിയതിനോ ഉള്ള യാതൊരുവിധ തെളിവുകളും കേസ് ഡയറിയിലോ ഫയലുകളിലോ ഇല്ലെന്ന് അഡ്വക്കേറ്റ് യൂസഫ് അൽ-മുഹമ്മദ് കോടതിയിൽ വാദിച്ചു. പ്രതിയുടെ കൈവശത്തുനിന്നും മദ്യവിൽപ്പനയിലൂടെ ലഭിച്ച പണമോ, കച്ചവടവുമായി ബന്ധപ്പെട്ട ഡയറികളോ ഫോൺ സന്ദേശങ്ങളോ കണ്ടെത്താൻ പ്രോസിക്യൂഷന് സാധിച്ചിട്ടില്ലെന്നും അദ്ദേഹം ചൂണ്ടിക്കാട്ടി.ഇതുകൂടാതെ, മദ്യം കടത്താൻ ഉപയോഗിച്ചെന്ന് പറയപ്പെടുന്ന വാഹനം സ്വന്തം പേരിൽ വാടകയ്ക്കെടുത്ത പ്രതിയുടെ മാതാവിന്റെ മൊഴിയും കേസിൽ നിർണ്ണായകമായി.
സംഭവം നടക്കുന്ന സമയത്ത് ഈ വാഹനത്തിനുള്ളിൽ നിരോധിത വസ്തുക്കളോ മദ്യക്കുപ്പികളോ താൻ കണ്ടിട്ടില്ലെന്നായിരുന്നു മാതാവ് കോടതിക്ക് നൽകിയ സാക്ഷ്യപത്രം. ഈ വാദങ്ങളും മാതാവിന്റെ മൊഴിയും പൂർണ്ണമായും വിശ്വസനീയമാണെന്ന് വിലയിരുത്തിയ കോടതി, വ്യക്തമായ തെളിവുകളുടെ അഭാവത്തിൽ പ്രതിക്ക് അനുകൂലമായി വിധി പ്രസ്താവിക്കുകയായിരുന്നു. നിയമവിരുദ്ധമായ മദ്യക്കച്ചവടത്തിന് പ്രതി മുതിർന്നുവെന്ന് തെളിയിക്കാൻ പ്രോസിക്യൂഷന് കഴിഞ്ഞിട്ടില്ലെന്ന് വ്യക്തമാക്കിയാണ് കീഴ്ക്കോടതിയുടെ വെറുതെ വിട്ടുകൊണ്ടുള്ള വിധി അപ്പീൽ കോടതിയും ശരിവെച്ചത്.
