കുവൈറ്റ് സിറ്റി: പൊതു ക്രമസമാധാനം ഉറപ്പുവരുത്തുന്നതിനും നിയമലംഘകരെ പിടികൂടുന്നതിനുമായി കുവൈറ്റിലെ ക്യാപിറ്റൽ ഗവർണറേറ്റ് സെക്യൂരിറ്റി ഡയറക്ടറേറ്റിന്റെ നേതൃത്വത്തിൽ വിപുലമായ സുരക്ഷാ പരിശോധന സംഘടിപ്പിച്ചു. മേഖലയിൽ സ്ഥാപിച്ച നാല് താൽക്കാലിക സുരക്ഷാ ചെക്ക്പോസ്റ്റുകൾ കേന്ദ്രീകരിച്ചായിരുന്നു പരിശോധന.
പരിശോധനയിൽ ഇഖാമ നിയമം ലംഘിച്ച് രാജ്യത്ത് കഴിഞ്ഞിരുന്ന 46 പേരും, വിവിധ കേസുകളിൽ കോടതി അറസ്റ്റ് വാറന്റ് പുറപ്പെടുവിച്ച 38 പേരും പിടികൂടപ്പെട്ടു. കൂടാതെ സ്പോൺസർമാർ ഒളിച്ചോടിയതായി പരാതി നൽകിയ 14 പേരെയും, ക്രിമിനൽ കേസുകളിൽ തിരയപ്പെട്ടിരുന്ന 4 പേരെയും, സിവിൽ കേസുകളുമായി ബന്ധപ്പെട്ട് വാറന്റുള്ള 3 പേരെയും പോലീസ് കസ്റ്റഡിയിലെടുത്തു. തിരിച്ചറിയൽ രേഖകളില്ലാത്ത രണ്ട് പേരും പിടിയിലായിട്ടുണ്ട്.
മയക്കുമരുന്ന് കൈവശം വെച്ചതിന് 4 കേസുകൾ രജിസ്റ്റർ ചെയ്യുകയും, മദ്യം കൈവശം വെച്ചതിന് 2 പേരെയും അനധികൃതമായി ചൂതാട്ടത്തിൽ ഏർപ്പെട്ടതിന് 2 പേരെയും അറസ്റ്റ് ചെയ്യുകയും ചെയ്തു. നിയമനടപടികളുടെ ഭാഗമായി ജുഡീഷ്യൽ ഉത്തരവ് നിലനിൽക്കുന്ന 25 വാഹനങ്ങൾ പിടിച്ചെടുക്കുകയും, വഴിയോരങ്ങളിൽ ഉപേക്ഷിക്കപ്പെട്ട നിലയിൽ കണ്ടെത്തിയ 57 വാഹനങ്ങൾ നീക്കം ചെയ്യുകയും ചെയ്തു. ട്രാഫിക് നിയമലംഘനങ്ങൾ നടത്തിയവർക്കെതിരെ 54 പിഴ ചുമത്തിയിട്ടുണ്ട്.
പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷ്യനുമായി ചേർന്ന് നടത്തിയ പരിശോധനയിൽ, കേടായ ഇറച്ചി വിൽപന നടത്തിയ കടയ്ക്കെതിരെ നിയമലംഘനം രേഖപ്പെടുത്തുകയും സ്ഥാപനം അടച്ചുപൂട്ടിക്കുകയും ചെയ്തു. ഈ സ്ഥാപനത്തിലെ രണ്ട് ജീവനക്കാരെ തുടർനടപടികൾക്കായി പോലീസ് സ്റ്റേഷനിലേക്ക് മാറ്റി. പിടികൂടിയ നിയമലംഘകർക്കെതിരെ അതത് അധികാരപരിധികൾക്ക് കീഴിൽ ആവശ്യമായ നിയമപരവും ഭരണപരവുമായ നടപടികൾ സ്വീകരിച്ചതായി സുരക്ഷാ അധികൃതർ അറിയിച്ചു.
