കുവൈത്ത്സിറ്റി: കുവൈത്തിൽ ഇന്ന് (നവംബർ 1, ഞായറാഴ്ച) വിവിധ പ്രദേശങ്ങളിൽ ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. രാജ്യത്ത് ചൂടും ഉയർന്ന ഈർപ്പവും അനുഭവപ്പെടുമെന്നും പ്രത്യേകിച്ച് തീരപ്രദേശങ്ങളിൽ ഈർപ്പത്തിന്റെ തോത് വർധിക്കുമെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കി.
പകൽ സമയത്ത് ഭാഗികമായി മേഘാവൃതമായ അന്തരീക്ഷമായിരിക്കും. ചില സമയങ്ങളിൽ ആകാശം പൂർണമായും മേഘാവൃതമാകാനും ഒറ്റപ്പെട്ട പ്രദേശങ്ങളിൽ മഴ ലഭിക്കാനും സാധ്യതയുണ്ട്. വൈകുന്നേരത്തോടെ ഇടിമിന്നലോടുകൂടിയ മഴയ്ക്കുള്ള സാധ്യതയും നിലനിൽക്കുന്നു.പകൽ സമയത്ത് തെക്കുകിഴക്കൻ ദിശയിൽ നിന്നും ദിശമാറിയും വീശുന്ന കാറ്റിന് മണിക്കൂറിൽ 8 മുതൽ 40 കിലോമീറ്റർ വരെ വേഗതയുണ്ടാകാം. ചില സമയങ്ങളിൽ കാറ്റിന്റെ ശക്തി വർധിക്കാനും സാധ്യതയുണ്ട്.ഇന്ന് രാജ്യത്ത് കൂടിയ താപനില 36 ഡിഗ്രി സെൽഷ്യസും കുറഞ്ഞ താപനില 26 ഡിഗ്രി സെൽഷ്യസുമായിരിക്കുമെന്നാണ് പ്രവചനം.
രാത്രിയിൽ കാലാവസ്ഥ താരതമ്യേന മിതമായിരിക്കുമെങ്കിലും തീരപ്രദേശങ്ങളിൽ ഉയർന്ന ഈർപ്പം തുടരും. അന്തരീക്ഷത്തിലെ ഈർപ്പം 95 ശതമാനം വരെ ഉയരാൻ സാധ്യതയുണ്ട്. രാത്രിയിലും ഒറ്റപ്പെട്ട മഴയ്ക്കും ഇടിമിന്നലിനും സാധ്യതയുണ്ടെന്നും ചില പ്രദേശങ്ങളിൽ മൂടൽമഞ്ഞ് രൂപപ്പെടാമെന്നും കാലാവസ്ഥാ വകുപ്പ് അറിയിച്ചു.കടലിൽ പകൽ സമയത്ത് തിരമാലകൾക്ക് 2 മുതൽ 5 അടി വരെയും രാത്രിയിൽ 1 മുതൽ 5 അടി വരെയും ഉയരമുണ്ടാകാം.മഴയ്ക്കും ഇടിമിന്നലിനും മൂടൽമഞ്ഞിനും സാധ്യതയുള്ളതിനാൽ വാഹനമോടിക്കുന്നവർ കാലാവസ്ഥാ സാഹചര്യങ്ങൾ ശ്രദ്ധിക്കേണ്ടതാണ്.
