കുവൈത്ത് സിറ്റി: ദൂരപാഠന (ഓൺലൈൻ) സംവിധാനത്തിൽ പഠിക്കുന്ന സെക്കൻഡറി തല വിദ്യാർത്ഥികൾക്കായി സ്കൂൾ സമയക്രമത്തിൽ മാറ്റം വരുത്തിയതായി വിദ്യാഭ്യാസ മന്ത്രാലയം അറിയിച്ചു. ആക്ടിംഗ് അണ്ടർസെക്രട്ടറി മുഹമ്മദ് അൽ-ഖാൽദി പുറത്തിറക്കിയ പ്രസ്താവനപ്രകാരം, പുതിയ സമയക്രമം രാവിലെ 9.00 മുതൽ ഉച്ചയ്ക്ക് 1.15 വരെ ആയിരിക്കും. ഇത് അടുത്ത അറിയിപ്പ് വരെയുള്ള കാലയളവിൽ പ്രാബല്യത്തിൽ തുടരും.പൊതു സ്കൂളുകൾ, സ്പെഷ്യൽ എജുക്കേഷൻ സ്ഥാപനങ്ങൾ, മതപഠന സ്കൂളുകൾ, സ്വകാര്യ സ്കൂളുകൾ എന്നിവയിലുളള വിദ്യാർത്ഥികൾക്ക് ഈ ക്രമീകരണം ബാധകമായിരിക്കും.
പുതിയ സംവിധാനപ്രകാരം, ഓരോന്നും 35 മിനിറ്റ് ദൈർഘ്യമുള്ള ആറു പീരിയഡുകളായിരിക്കും ക്ലാസുകൾ. പഠനത്തിന്റെ ഗുണമേന്മ നിലനിർത്തുന്നതിനും പാഠ്യവിഷയങ്ങൾ ശരിയായ രീതിയിൽ വിതരണം ചെയ്യുന്നതിനും ഇത് സഹായകരമാകുമെന്ന് മന്ത്രാലയം വ്യക്തമാക്കി.പുതിയ സമയക്രമം കൃത്യമായി പാലിക്കണമെന്ന് അധ്യാപകരോടും ഭരണസംബന്ധിയായ സ്റ്റാഫിനോടും വിദ്യാർത്ഥികളോടും മന്ത്രാലയം അഭ്യർത്ഥിച്ചു.
