കുവൈറ്റ് സിറ്റി: റോഡിൽ യാത്രക്കാരുടെ സുരക്ഷ ഉറപ്പാക്കുന്നതിന് മുൻഗണന നൽകിക്കൊണ്ട്, വാഹനങ്ങൾ പെട്ടെന്ന് തകരാറിലാകുന്ന സാഹചര്യങ്ങളിൽ ഡ്രൈവർമാർ പാലിക്കേണ്ട സുരക്ഷാ മാർഗ്ഗരേഖ പൊതു ഗതാഗത വകുപ്പ് പുറപ്പെടുവിച്ചു. വാഹനം തകരാറിലായാൽ സാധ്യമാകുന്ന സാഹചര്യങ്ങളിലെല്ലാം റോഡിന്റെ ഏറ്റവും വലതുവശത്തേക്ക് മാറ്റി നിർത്തണമെന്നും തുടർന്ന് ഉടൻ തന്നെ ഹസാർഡ് ലൈറ്റുകൾ തെളിയിക്കണമെന്നും നിർദ്ദേശത്തിൽ പറയുന്നു. മറ്റ് വാഹനങ്ങൾക്ക് മുന്നറിയിപ്പ് നൽകുന്നതിനായി തകരാറിലായ വാഹനത്തിന് കുറഞ്ഞത് നൂറ് മീറ്റർ പിന്നിലായി വാണിംഗ് ട്രയാംഗിൾ സ്ഥാപിക്കുകയും, കൃത്യമായ സ്ഥലം വ്യക്തമാക്കിക്കൊണ്ട് അടിയന്തര സഹായ നമ്പറായ 112-ൽ ബന്ധപ്പെടുകയും വേണം.
വേനൽക്കാലത്തെ ഉയർന്ന താപനില ടയറുകൾക്ക് കേടുപാടുകൾ വരുത്തുന്നതിനും അവ പൊട്ടിത്തെറിക്കുന്നതിനും കാരണമാകുന്നതിനാൽ, വാഹനങ്ങളുടെ കൃത്യമായ അറ്റകുറ്റപ്പണികൾ നടത്താനും ടയറുകളുടെ ഗുണനിലവാരവും വായു മർദ്ദവും പരിശോധിക്കാനും അധികൃതർ ഡ്രൈവർമാരോട് ആവശ്യപ്പെട്ടു. ഈ മുൻകരുതലുകൾ പാലിക്കുന്നത് റോഡപകടങ്ങൾ കുറയ്ക്കാനും സുരക്ഷ വർദ്ധിപ്പിക്കാനും സഹായിക്കുമെന്നും, ഒപ്പം തന്നെ അടിയന്തര രക്ഷാപ്രവർത്തകർക്ക് തടസ്സമില്ലാതെ സംഭവസ്ഥലത്ത് എത്തിച്ചേർന്ന് ആവശ്യമായ സഹായം നൽകാൻ സാധിക്കുമെന്നും ഉദ്യോഗസ്ഥർ വ്യക്തമാക്കി.
