കുവൈത്ത് സിറ്റി: ജനറൽ ട്രാഫിക് ഡയറക്ടറേറ്റിന്റെ പ്രതിവാര കണക്കുകൾ പ്രകാരം, ജൂൺ 15 മുതൽ 21 വരെ ഒരാഴ്ചയ്ക്കിടെ കുവൈറ്റിൽ 16,721 ട്രാഫിക് നിയമലംഘനങ്ങൾ രേഖപ്പെടുത്തി. ഇതിൽ ഒരു ദിവസം മാത്രം 2,790 നിയമലംഘനങ്ങളാണ് റിപ്പോർട്ട് ചെയ്തത്.
ഈ കാലയളവിൽ 354 വാഹനങ്ങളും 5 മോട്ടോർസൈക്കിളുകളും പിടിച്ചെടുത്തു. 42 പേരെ കസ്റ്റഡിയിലെടുത്തതോടൊപ്പം ലൈസൻസില്ലാതെ വാഹനം ഓടിച്ച 7 പ്രായപൂർത്തിയാകാത്തവരെയും അറസ്റ്റ് ചെയ്തു.
കൂടാതെ താമസനിയമലംഘകരായ 31 പേരെയും പിടികൂടി. ഇവരിൽ 6 പേർക്കെതിരെ ഹാജരാകാതിരുന്നതിന്റെ കേസുകളും 26 പേർ വിവിധ കേസുകളിൽ ആവശ്യക്കാരുമായിരുന്നുവെന്ന് അധികൃതർ അറിയിച്ചു.
ഒരാഴ്ചയ്ക്കിടെ 1,215 ട്രാഫിക് അപകടങ്ങളും കൂട്ടിയിടികളും കൈകാര്യം ചെയ്തതോടൊപ്പം 2,339 പരാതികളും ട്രാഫിക് വിഭാഗത്തിന് ലഭിച്ചു.
ഇന്നലെ മാത്രം രേഖപ്പെടുത്തിയ 2,790 നിയമലംഘനങ്ങളിൽ 174 റഡാർ കേസുകൾ, 24 ടോവിംഗ് നിയമലംഘനങ്ങൾ, 79 അമിത ടിന്റിംഗ് കേസുകൾ, 94 മൊബൈൽ ഫോൺ ഉപയോഗ കേസുകൾ, 33 അമിതവേഗ കേസുകൾ, 71 ട്രക്ക് നിയമലംഘനങ്ങൾ, 60 സീറ്റ് ബെൽറ്റ് ധരിക്കാത്ത കേസുകൾ എന്നിവ ഉൾപ്പെടുന്നു.
