കുവൈത്ത്സിറ്റി: ഇന്ത്യയുടെയും കുവൈത്തിന്റെയും സാംസ്കാരിക പാരമ്പര്യങ്ങൾ ഒരുമിപ്പിച്ച് കുവൈത്തിലെ ഇന്ത്യൻ എംബസി സംഘടിപ്പിച്ച ദീപാവലി ദിവാനിയ ആഘോഷം ശ്രദ്ധേയമായി. നവംബർ രണ്ട്, മൂന്ന് തീയതികളിൽ ഇന്ത്യൻ അംബാസഡറുടെ ഔദ്യോഗിക വസതിയായ ഇന്ത്യ ഹൗസിലായിരുന്നു രണ്ട് ദിവസത്തെ ആഘോഷ പരിപാടികൾ നടന്നത്.
ഇന്ത്യയും കുവൈത്തും തമ്മിലുള്ള നയതന്ത്രബന്ധത്തിന്റെ 65-ാം വാർഷികത്തോടനുബന്ധിച്ചാണ് പ്രത്യേക ആഘോഷം സംഘടിപ്പിച്ചത്. ഇന്ത്യയുടെ പ്രകാശോത്സവമായ ദീപാവലിയെയും കുവൈത്തിന്റെ പരമ്പരാഗത ഒത്തുചേരൽ സംസ്കാരമായ ദിവാനിയയെയും ഒരേ വേദിയിൽ അവതരിപ്പിച്ച പരിപാടി ഇരുരാജ്യങ്ങളും തമ്മിലുള്ള ദീർഘകാല സൗഹൃദത്തിന്റെയും സാംസ്കാരിക ബന്ധത്തിന്റെയും പ്രതീകമായി മാറി.2025-ൽ ദീപാവലിയും കുവൈത്തി ദിവാനിയയും യുനെസ്കോയുടെ മാനവരാശിയുടെ അമൂർത്ത സാംസ്കാരിക പൈതൃക പട്ടികയിൽ ഇടം നേടിയിരുന്നു. ഈ അംഗീകാരത്തിന്റെ പശ്ചാത്തലത്തിൽ സംഘടിപ്പിച്ച ആഘോഷത്തിന് പ്രത്യേക പ്രാധാന്യമുണ്ടെന്ന് എംബസി വ്യക്തമാക്കി.നവംബർ രണ്ടിന് നടന്ന ആദ്യദിന പരിപാടികൾക്ക് ഇന്ത്യൻ അംബാസഡർ പരമിത ത്രിപാഠിയും ഭർത്താവ് ഡോ. പ്രദ്യുമ്ന ത്രിപാഠിയും ആതിഥേയത്വം വഹിച്ചു.
കുവൈത്തിലെ പ്രമുഖ വ്യക്തികൾ, വിവിധ രാജ്യങ്ങളിലെ നയതന്ത്ര പ്രതിനിധികൾ, ഇന്ത്യൻ സമൂഹത്തിലെ അംഗങ്ങൾ, മാധ്യമപ്രവർത്തകർ, വ്യവസായ പ്രമുഖർ തുടങ്ങിയവർ പരിപാടിയിൽ പങ്കെടുത്തു. ഇന്ത്യൻ സംഗീത പാരമ്പര്യം പരിചയപ്പെടുത്തുന്ന തത്സമയ വാദ്യസംഗീത പരിപാടികളും അരങ്ങേറി.നവംബർ മൂന്നിന് വനിതകൾക്കായി പ്രത്യേക ദീപാവലി ദിവാനിയയും സംഘടിപ്പിച്ചു. അംബാസഡർ പരമിത ത്രിപാഠിയുടെ നേതൃത്വത്തിൽ നടന്ന പരിപാടിയിൽ ഇന്ത്യൻ കലാകാരന്മാരുടെ നൃത്താവിഷ്കാരങ്ങളും കഥക് ഫ്യൂഷൻ പ്രകടനങ്ങളും ശ്രദ്ധേയമായി. കുവൈത്തി വസ്ത്രാലങ്കാര ശൈലിയിൽനിന്ന് പ്രചോദനം ഉൾക്കൊണ്ട ആധുനിക ഡിസൈനുകളിലൂടെ ഇന്ത്യൻ തുണിത്തരങ്ങളുടെ വൈവിധ്യം അവതരിപ്പിച്ച ഫാഷൻ ഷോയും പരിപാടിയുടെ ഭാഗമായി.
പരമ്പരാഗത ഇന്ത്യൻ മെഹന്തി കലയും സാരി ഉടുക്കുന്ന രീതിയും അതിഥികൾക്ക് പരിചയപ്പെടുത്തി. വിവിധ ഇന്ത്യൻ സംസ്ഥാനങ്ങളിലെ തനത് വിഭവങ്ങൾ, കരകൗശല ഉൽപ്പന്നങ്ങൾ, കലാരൂപങ്ങൾ, വിനോദസഞ്ചാര സാധ്യതകൾ എന്നിവയും ആഘോഷവേദിയിൽ അവതരിപ്പിച്ചു.കേന്ദ്ര സർക്കാരിന്റെ ‘ഒരു ജില്ല, ഒരു ഉൽപ്പന്നം’ (ODOP) പദ്ധതിയുടെ ഭാഗമായി ഇന്ത്യൻ കരകൗശല ഉൽപ്പന്നങ്ങളുടെ പ്രത്യേക പ്രദർശനവും ഒരുക്കിയിരുന്നു. ബ്ലൂ പോട്ടറി, പരമ്പരാഗത വിളക്കുകൾ, സൂക്ഷ്മമായ ലോഹപ്പണികൾ, ചിത്രകലാ സൃഷ്ടികൾ തുടങ്ങിയവ പ്രദർശനത്തിൽ ഇടം നേടി.
ഇന്ത്യൻ കലാകാരന്മാരുടെ കഴിവുകളും രാജ്യത്തിന്റെ സമ്പന്നമായ സാംസ്കാരിക പൈതൃകവും അന്താരാഷ്ട്ര സമൂഹത്തിന് പരിചയപ്പെടുത്തുന്നതിനൊപ്പം ഇന്ത്യ–കുവൈത്ത് ജനതകൾ തമ്മിലുള്ള സൗഹൃദവും പരസ്പര സഹകരണവും കൂടുതൽ ശക്തിപ്പെടുത്തുന്നതായിരുന്നു ആഘോഷം.പരിപാടിയുടെ വിജയകരമായ നടത്തിപ്പിന് സഹകരിച്ച ഇന്ത്യൻ ഹെറിറ്റേജ് സംഘടനയ്ക്ക് ഇന്ത്യൻ എംബസി നന്ദി അറിയിച്ചു.
