കുവൈത്ത്സിറ്റി: കുവൈറ്റിൽ പൊതുസ്ഥലത്ത് മദ്യപിച്ച് ബോധമില്ലാതെ പെരുമാറുകയും ജീവനക്കാർക്കിടയിൽ പ്രശ്നങ്ങൾ സൃഷ്ടിക്കുകയും ചെയ്ത ഏഷ്യക്കാരനായ ഡെലിവറി തൊഴിലാളിയെ ഭരണപരമായ നാടുകടത്തൽ നടപടികൾക്കായി ജനറൽ ഡയറക്ടറേറ്റ് ഓഫ് ഫർവാനിയ സെക്യൂരിറ്റി കമാൻഡ് കൈമാറി.ഒരു പ്രമുഖ ഫുഡ് സപ്ലൈ കമ്പനിയിലെ ഉദ്യോഗസ്ഥൻ നൽകിയ പരാതിയുടെ അടിസ്ഥാനത്തിലാണ് പോലീസ് നടപടി. കമ്പനിയിൽ ജോലി ചെയ്യുന്ന 1989-ൽ ജനിച്ച തൊഴിലാളി മദ്യലഹരിയിൽ സഹപ്രവർത്തകർക്കിടയിൽ നിരന്തരമായി പ്രശ്നങ്ങൾ ഉണ്ടാക്കുന്നുവെന്ന് ആഭ്യന്തര മന്ത്രാലയത്തിന്റെ ഓപ്പറേഷൻസ് റൂമിൽ ഉദ്യോഗസ്ഥൻ വിവരമറിയിക്കുകയായിരുന്നു.
സന്ദേശം ലഭിച്ചയുടൻ ഫർവാനിയ സുരക്ഷാ പട്രോളിംഗ് സംഘം സംഭവസ്ഥലത്തെത്തി പ്രതിയെ കസ്റ്റഡിയിലെടുത്തു. പോലീസ് എത്തുമ്പോൾ ഇയാൾ കടുത്ത മദ്യലഹരിയിലായിരുന്നുവെന്നും ഒരു മിനിറ്റിലധികം നേരം പോലും സ്വന്തമായി നിവർന്നു നിൽക്കാൻ കഴിയാത്ത അവസ്ഥയിലായിരുന്നുവെന്നും സുരക്ഷാ വൃത്തങ്ങൾ വെളിപ്പെടുത്തി. പൊതുസ്ഥലത്തെ മദ്യപാനവും ക്രമസമാധാന ലംഘനവും ഗൗരവതരമായി കണ്ട അധികൃതർ, ഇയാളെ രാജ്യത്തുനിന്ന് അടിയന്തരമായി നാടുകടത്തുന്നതിനുള്ള തുടർനടപടികൾക്കായി ഡിപ്പോർട്ടേഷൻ വിഭാഗത്തിലേക്ക് മാറ്റാൻ ഉത്തരവിടുകയായിരുന്നു.
