കുവൈറ്റ് സിറ്റി : കുവൈത്തിലെ കടുത്ത വേനൽച്ചൂടിനെ ചെറുക്കാൻ മരങ്ങൾ നട്ട് പച്ചപ്പുള്ള മേഖലകൾ വർധിപ്പിക്കുന്നതും കെട്ടിടങ്ങൾക്കും പൊതുസ്ഥലങ്ങൾക്കും ഇളം നിറങ്ങൾ തിരഞ്ഞെടുക്കുന്നതുമാണ് ഏറ്റവും ഫലപ്രദമായ മാർഗങ്ങളെന്ന് കാലാവസ്ഥാ വിദഗ്ധൻ ഈസ റമദാൻ വ്യക്തമാക്കി.ചൊവ്വാഴ്ച ദായിയ പ്രദേശത്ത് നടത്തിയ ഫീൽഡ് പരീക്ഷണത്തിൽ വിവിധ ഉപരിതലങ്ങളിലെ താപനിലയിൽ വലിയ വ്യത്യാസങ്ങൾ കണ്ടെത്തിയതായി അദ്ദേഹം പറഞ്ഞു. രാവിലെ 11:45-ന് കടലിനോട് ചേർന്ന ദായിയ പ്രദേശത്തെ നിഴലിലെ വായു താപനില 45.1°C ആയിരുന്നു. എന്നാൽ നേരിട്ട് സൂര്യപ്രകാശം പതിച്ച ഇളം നിറത്തിലുള്ള ടൈൽ നിലത്തിൽ താപനില ഏകദേശം 51°C വരെ ഉയർന്നു.കറുത്ത നിറത്തിലുള്ള സോളാർ പാനലിൽ താപനില ഏകദേശം 77°C രേഖപ്പെടുത്തിയതായും, ഇരുണ്ട നിറങ്ങൾ കൂടുതൽ സൂര്യവികിരണം ആഗിരണം ചെയ്യുന്നതിനാലാണിതെന്നും അദ്ദേഹം വ്യക്തമാക്കി.
അതേസമയം, കോൺകാർപസ് മരത്തിന്റെ ഉപരിതല താപനില വെറും 39°C മാത്രമായിരുന്നു. ഇത് ഇളം നിറത്തിലുള്ള ടൈലിനേക്കാൾ ഏകദേശം 12°C കുറവും കറുത്ത ഉപരിതലത്തേക്കാൾ 38°C കുറവുമാണെന്ന് പരീക്ഷണഫലങ്ങൾ തെളിയിച്ചു.പച്ചപ്പ് വർധിപ്പിക്കൽ, കൂടുതൽ മരങ്ങൾ നട്ട് പരിപാലിക്കൽ, റോഡുകൾ, കെട്ടിടങ്ങൾ, പൊതുസ്ഥലങ്ങൾ എന്നിവയിൽ ഇളം നിറങ്ങൾ ഉപയോഗിക്കൽ എന്നിവ നഗരങ്ങളിലെ താപനില ഗണ്യമായി കുറയ്ക്കാനും ‘അർബൻ ഹീറ്റ് ഐലൻഡ്’ പ്രതിഭാസത്തിന്റെ ആഘാതം നിയന്ത്രിക്കാനും സഹായിക്കുമെന്ന് ഈസ റമദാൻ പറഞ്ഞു.
