കുവൈത്ത് സിറ്റി, ജൂൺ 28: പബ്ലിക് അതോറിറ്റി ഫോർ സിവിൽ ഇൻഫർമേഷൻ (PACI) 464 പേരുടെ രജിസ്റ്റർ ചെയ്ത താമസ വിലാസങ്ങൾ ഔദ്യോഗിക രേഖകളിൽ നിന്ന് റദ്ദാക്കിയതായി അറിയിച്ചു. ബാധിതരായവർ 30 ദിവസത്തിനകം പുതിയ വിലാസം രജിസ്റ്റർ ചെയ്യുകയോ വിവരങ്ങൾ പുതുക്കുകയോ ചെയ്യണമെന്ന് അധികൃതർ നിർദേശിച്ചു.ഞായറാഴ്ച പ്രസിദ്ധീകരിച്ച ‘കുവൈത്ത് അൽ യൗം’ ഔദ്യോഗിക ഗസറ്റിലൂടെയാണ് തീരുമാനം പ്രഖ്യാപിച്ചത്.
കെട്ടിട ഉടമകൾ സമർപ്പിച്ച പ്രഖ്യാപനങ്ങൾ, അല്ലെങ്കിൽ ബന്ധപ്പെട്ട കെട്ടിടങ്ങൾ പൊളിച്ചുമാറ്റപ്പെട്ടത് എന്നിവയെ തുടർന്നാണ് വിലാസങ്ങൾ റദ്ദാക്കിയതെന്ന് PACI വ്യക്തമാക്കി.ബാധിതർ ആവശ്യമായ രേഖകൾ സമർപ്പിച്ച ശേഷം PACI ഓഫീസുകൾ സന്ദർശിച്ചോ ‘സഹൽ’ (Sahel) ആപ്പ് വഴിയോ പുതിയ താമസ വിലാസം രജിസ്റ്റർ ചെയ്യുകയോ വിവരങ്ങൾ പുതുക്കുകയോ വേണം.
തീരുമാനം പ്രസിദ്ധീകരിച്ച തീയതി മുതൽ 30 ദിവസത്തിനകം നടപടികൾ പൂർത്തിയാക്കാത്തവർക്ക് 1982-ലെ നിയമം നമ്പർ 32-ന്റെ ആർട്ടിക്കിൾ 33 പ്രകാരം 100 കുവൈത്തി ദിനാർ വരെ പിഴ ചുമത്താൻ സാധ്യതയുണ്ടെന്ന് PACI മുന്നറിയിപ്പ് നൽകി. ഉൾപ്പെട്ട വ്യക്തികളുടെ എണ്ണത്തിനനുസരിച്ച് പിഴത്തുക വർധിക്കാനും സാധ്യതയുണ്ട്.
