കുവൈത്ത് സിറ്റി: ശ്വാസകോശ രോഗങ്ങൾ കുറയ്ക്കുന്നതിനും ആരോഗ്യസങ്കീർണതകൾക്ക് കൂടുതൽ സാധ്യതയുള്ള വിഭാഗങ്ങളെ സംരക്ഷിക്കുന്നതിനുമായി റെസ്പിറേറ്ററി സിങ്കീഷ്യൽ വൈറസ് (RSV) പ്രതിരോധ പദ്ധതി കൂടുതൽ വിപുലീകരിച്ചതായി കുവൈത്ത് ആരോഗ്യ മന്ത്രാലയം അറിയിച്ചു.
ആർഎസ്എവി വാക്സിൻ പ്രായമായവർക്കും ദീർഘകാല രോഗങ്ങളുള്ളവർക്കും തുടർന്നും നൽകുന്നതോടൊപ്പം, ഗർഭകാലത്തിന്റെ 32 മുതൽ 36 ആഴ്ചയ്ക്കിടയിലുള്ള ഗർഭിണികൾക്ക് ഐച്ഛികമായി വാക്സിൻ ലഭ്യമാക്കുമെന്നും മന്ത്രാലയം അറിയിച്ചു. ഇതിലൂടെ ജനിക്കുന്ന കുഞ്ഞുങ്ങൾക്ക് ജീവിതത്തിന്റെ ആദ്യ മാസങ്ങളിൽ തന്നെ വൈറസിനെതിരായ സംരക്ഷണം ലഭിക്കുകയാണ് ലക്ഷ്യം.
ഗർഭിണികൾക്ക് വാക്സിൻ നൽകുന്നത് വഴി അമ്മയുടെ ശരീരത്തിൽ രൂപപ്പെടുന്ന ആന്റിബോഡികൾ ഗർഭസ്ഥ ശിശുവിലേക്ക് കൈമാറപ്പെടുകയും, ജനനശേഷം ആദ്യ മാസങ്ങളിൽ ആർഎസ്എവി മൂലമുണ്ടാകാവുന്ന ഗുരുതര ആരോഗ്യപ്രശ്നങ്ങളുടെ സാധ്യത കുറയുകയും ചെയ്യുമെന്ന് മന്ത്രാലയം വ്യക്തമാക്കി.
സമൂഹാരോഗ്യം മെച്ചപ്പെടുത്തുന്നതിനും രോഗപ്രതിരോധം ശക്തിപ്പെടുത്തുന്നതിനും ഏറ്റവും അപകടസാധ്യതയുള്ള വിഭാഗങ്ങൾക്ക് കൂടുതൽ ആരോഗ്യസംരക്ഷണം ഉറപ്പാക്കുന്നതിനുമുള്ള ആരോഗ്യ മന്ത്രാലയത്തിന്റെ സമഗ്ര തന്ത്രത്തിന്റെ ഭാഗമായാണ് ഈ പദ്ധതി വിപുലീകരിച്ചതെന്നും അധികൃതർ അറിയിച്ചു.
