കുവൈത്ത് സിറ്റി, ജൂലൈ 19: എത്യോപ്യയിലെ അഡിസ് അബാബയിൽ നിന്ന് കുവൈത്തിലേക്ക് എത്തിയ യാത്രക്കാരനിൽ നിന്ന് 8.547 കിലോഗ്രാം ഹാഷിഷ് കുവൈത്ത് അന്താരാഷ്ട്ര വിമാനത്താവളത്തിലെ ടെർമിനൽ-4ൽ കസ്റ്റംസ് അധികൃതർ പിടിച്ചെടുത്തു.
കസ്റ്റംസ് ജനറൽ അഡ്മിനിസ്ട്രേഷന്റെ നേതൃത്വത്തിൽ നടത്തിയ പരിശോധനയിലാണ് ബെനിൻ സ്വദേശിയുടെ രണ്ട് സ്യൂട്ട്കേസുകളിൽ ഒളിപ്പിച്ച നിലയിൽ മയക്കുമരുന്ന് കണ്ടെത്തിയത്.സ്യൂട്ട്കേസുകളുടെ അകത്തെ ലൈനിംഗിനുള്ളിൽ ടിൻ ഫോയിലിൽ പൊതിഞ്ഞ് സൂക്ഷ്മമായി ഒളിപ്പിച്ചിരുന്ന ഹാഷിഷിൽ, ഒരു സ്യൂട്ട്കേസിൽ 3.732 കിലോഗ്രാമും മറ്റൊന്നിൽ 4.815 കിലോഗ്രാമും ഉണ്ടായിരുന്നു.
സംഭവത്തിൽ പ്രതിയെയും പിടിച്ചെടുത്ത മയക്കുമരുന്നും തുടർ നിയമനടപടികൾക്കായി ജനറൽ ഡയറക്ടറേറ്റ് ഫോർ ഡ്രഗ് ആൻഡ് ആൽക്കഹോൾ കൺട്രോളിന് കൈമാറി.രാജ്യത്തേക്ക് മയക്കുമരുന്ന് കടത്താനുള്ള ശ്രമങ്ങൾ ശക്തമായി തടയുന്നതിനായി എല്ലാ പ്രവേശന കവാടങ്ങളിലും പരിശോധനകൾ കൂടുതൽ കർശനമാക്കുമെന്ന് കുവൈത്ത് കസ്റ്റംസ് അറിയിച്ചു.
